កូនខ្មែរបញ្ចេញឈុតសម្លៀកបំពាក់ Don’t ថៃ To Me ជាសារទៅកាន់ពិភពលោក ដើម្បីរកយុត្តិធម៌ជូនកម្ពុជាពីការឈ្លានពានរបស់ថៃ

ខណៈចោរសៀមនៅតែចិញ្ចឹមចិត្តឈ្លានពានកម្ពុជា ហើយព្យាយាមបំភ្លៃការពិតទៅកាន់អន្តរជាតិ កូនខ្មែរគ្រប់ទិសទីក៏បានពួតដៃគ្នារកយុត្តិធម៌វិញ ដោយប្រកាសទៅកាន់ពិភពលោកតាមរយៈវិធីផ្សេងៗ និង ជំនាញរៀងៗខ្លួន។ ជាក់ស្តែង ដូចជាម៉ាកសម្លៀកបំពាក់របស់កូនខ្មែរមួយឈ្មោះថា It is what it is បានបញ្ចេញខូឡិកហ្សិនមួយក្តៅៗ ដែលនៅលើសម្លៀកបំពាក់ មានអក្សរយ៉ាងច្បាស់ថា Don’t ថៃ To Me។

ខូឡិកហ្សិនជាស្ទីលបែប Street Wear នេះ មកជាឈុតបុរស និង នារី ដោយនៅលើឈុតនារី ត្រង់អាវមានអក្សរអង់គ្លេស Peace ឬ សន្តិភាព ដែលក្នុងន័យកម្ពុជាចង់បានសន្តិភាព។ ចំណែកត្រង់ខោមានពាក្យ Don’t ថៃ To Me និង ពាក្យ Speak The Truth To The World ឬ និយាយការពិតទៅកាន់ពិភពលោក។ ចំណែកឈុតបុរស ត្រង់អាវមានអក្សរ We don’t need war We need peace ឬ យើងមិនត្រូវការសង្គ្រាម យើងត្រូវការសន្តិភាព។

ជាមួយការថតបង្ហាញខូឡិកហ្សិន ម៉ូឌែលនៃម៉ាកនេះក៏បានលើកបដាជាសារ Thailand Opened the War And Never Cease Fire ឬ ថៃបើកសង្គ្រាម និង មិនឈប់បាញ់ឡើយ។ ក្រោយបង្ហោះរូបភាពខូឡិកហ្សិននៅលើបណ្តាញសង្គមនានា ឃើញថាមហាជនខ្មែរ និង អន្តរជាតិមានការចាប់អារម្មណ៍ខ្លាំង។

គួរឱ្យដឹងដែរថា ខូឡិកហ្សិនសម្លៀកបំពាក់ Don’t ថៃ To Me ដែលមានម៉ាកឈ្មោះ It is what it is គឺជាស្នាដៃរបស់យុវតីជាអ្នកច្នៃម៉ូដមួយរូបឈ្មោះ សេង សុវណ្ណរចនា ហៅ Amaris Desi ដោយកន្លងមកយុវតីរូបនេះ តែងបានបញ្ចេញស្នាដៃម៉ូដសម្លៀកបំពាក់ស្រស់ស្អាត និង ប្រណីតជាច្រើនសម្រាប់តារាល្បីៗ ក្នុងនោះក៏មានទាំងបវរកញ្ញាល្បីៗផងដែរ៕