អបអរសាទរ ថ្ងៃទី ១៧ ខែកញ្ញា ឆ្នាំ ២០២៥ នេះ គឺជាខួបគម្រប់ ២ ឆ្នាំ នៃការដាក់បញ្ចូលរមណីយដ្ឋានប្រាសាទកោះកេរ ក្នុងបញ្ជីបេតិកភណ្ឌពិភពលោក របស់អង្គការយូណេស្កូ ( ១៧ កញ្ញា ២០២៣- ១៧ កញ្ញា ២០២៥)។
សូមរំឭកផងដែរថា នៅថ្ងៃទី ១៧ ខែកញ្ញា ឆ្នាំ ២០២៣ ពោលកាលពី ២ ឆ្នាំមុន ប្រជាជនកម្ពុជា បាននាំគ្នាទះដៃអបអរសាទរប្រកបដោយទឹកចិត្តមោទក និង សប្បាយរីករាយចំពោះព្រឹត្តិការណ៍ជាប្រវត្តិសាស្ត្រ នៃការដាក់បញ្ចូលរមណីយដ្ឋានប្រាសាទកោះកេរ ក្នុងបញ្ជីបេតិកភណ្ឌពិភពលោក របស់អង្គការយូណេស្កូ នៅក្នុងកិច្ចប្រជុំលើកទី ៤៥ របស់គណៈកម្មាធិការបេតិកភណ្ឌពិភពលោក នៅទីក្រុងរីយ៉ាដ ប្រទេសអារ៉ាប៊ីសាអូឌីត នាថ្ងៃ ១៧ កញ្ញា ២០២៣ វេលាម៉ោង ៤:៣០ នាទីល្ងាច ម៉ោងនៅកម្ពុជា។
គួរឱ្យដឹងថា ប្រាសាទកោះកេរ ស្ថិតនៅក្នុងភូមិកោះកេរ្តិ៍ ឃុំស្រយ៉ង់ ស្រុកគូលែន ខេត្តព្រះវិហារ។ ប្រាសាទកោះកេរមានចម្ងាយប្រមាណ ១២០ គីឡូម៉ែត្រពីទីរួមខេត្តសៀមរាប និង មានចម្ងាយប្រមាណ ៦០ គីឡូម៉ែត្រពីទីរួមខេត្តព្រះវិហារ។ ចំណែកឯចម្ងាយពីរាជធានីភ្នំពេញមានចម្ងាយ ៤៦០ គីឡូម៉ែត្រ។ ប្រាសាទនេះ គឺជា «អតីតរាជធានី បុរីលិង្គ ឬ ឆោគគ៌្យរ» ដែលព្រះបាទជ័យវរ្ម័នទី ៤ បានចាប់ផ្ដើមកសាងរាជធានីនៅកោះកេរ នាឆ្នាំ ៩២១ នៃគ្រឹស្តសករាជ ហើយបានគ្រងរាជ្យជាផ្លូវការពីឆ្នាំ ៩២៨ ដល់ឆ្នាំ ៩៤១ នៃគ្រឹស្ដសករាជ។ បន្ទាប់មកព្រះរាជបុត្រព្រះបាទហរសវរ្ម័នទី ២ បានឡើងគ្រងរាជបន្តបានរយៈពេលខ្លី រហូតដល់ឆ្នាំ ៩៤៤ នៃគ្រឹស្ដសករាជ។ ដែលរាជធានីរបស់ព្រះអង្គឈ្មោះ «លិង្គបុរ (បុរីលិង្គ) ជាភាសាសំស្ក្រឹត និង ឆោគគ៌្យរ ជាភាសាខ្មែរ» ដែលឈ្មោះបច្ចុប្បន្នគឺប្រាសាទកោះកេរ៕
