មិនបាច់ព្រួយទេ! អ្នកមកពីខេត្ត បើអត្តសញ្ញាណប័ណ្ណខូច ហួសសុពលភាព អាចធ្វើថ្មីនៅភ្នំពេញបាន គឺនៅទីតាំង ៣ នេះ

កាលពីកន្លងទៅថ្មីៗនេះ តាមរយៈឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានចែករំលែកចំណេះដឹងទូទៅពាក់ព័ន្ធទៅនឹងទីតាំងទទួលសេវាអត្តសញ្ញាណប័ណ្ណនៅរាជធានីភ្នំពេញ សម្រាប់បងប្អូនប្រជាពលរដ្ឋមកពីគ្រប់រាជធានីខេត្ត។

ក្នុងនោះ ឯកឧត្តមអគ្គនាយករង នៃអគ្គនាយកដ្ឋានអត្តសញ្ញាណកម្ម បានបញ្ជាក់ឱ្យបានដឹងថា សម្រាប់ពលរដ្ឋមកពីគ្រប់រាជធានី-ខេត្ត ដែលត្រូវទទួលផ្តល់សេវាធ្វើថ្មី បន្តសុពលភាព ខូច ឬ កែតម្រូវអត្តសញ្ញាណប័ណ្ណ អាចធ្វើឡើងនៅទីតាំង ចំនួន ៣ នៅរាជធានីភ្នំពេញ ដែលមានដូចជា ៖

១. ទីស្នាក់ការផ្តល់អត្តសញ្ញាណប័ណ្ណសញ្ជាតិខ្មែរនៅផ្សារទំនើបអ៊ីអន ២ (Aeon2)

២. ទីស្នាក់ការផ្តល់អត្តសញ្ញាណប័ណ្ណសញ្ជាតិខ្មែរនៅផ្សារទំនើបអ៊ីអន ៣ (Aeon3)

៣. នាយកដ្ឋានអត្តសញ្ញាណប័ណ្ណ ដែលមានទីតាំង ស្ថិតនៅក្រោយវត្តនិរោធ

ក្នុងនោះផងដែរ ករណីដែលបងប្អូនមកពីបណ្ដាខេត្ត ចង់បន្តសុពលភាពអត្តសញ្ញាណប័ណ្ណនៅទីតាំងខាងលើ អាចយកតែអត្តសញ្ញាណប័ណ្ណចាស់ទៅបាន លើកលែងតែមានករណីសង្ស័យ ឬ ប្តូរអាសយដ្ឋាន ទើបត្រូវមានឯកសារបន្ថែម ដូចជាសេចក្តីចម្លងសំបុត្រកំណើត និង សៀវភៅស្នាក់នៅ ឬ សៀវភៅគ្រួសារជាដើម៕