ជាទូទៅនៅថ្ងៃទិវានៃក្តីស្រលាញ់ ១៤ កុម្ភៈ គេតែងបង្ហាញការស្រលាញ់តាមរយៈការឱ្យកាដូគ្នា ដូចជាផ្កា ឬ របស់ប្រើប្រាស់ ជាដើម។ យ៉ាងណាមិញ បុរសខិលខូចមួយចំនួនតែងឆ្លៀតឱកាសនេះ ប្រើកាដូជាថ្នូរជាមួយដៃគូ ដែលបំណងភាគច្រើនគេចង់បានការតបស្នងជាភាពស្និទ្ធស្នាល ឬ រហូតចង់បានខ្លួនប្រាណ។ ជានារីឆ្លាតវៃ មុនទទួលកាដូពីដៃគូ អ្នកគួរពិចារណាឱ្យបានច្បាស់ ពុំដូច្នោះអាចជាប់អន្ទាក់ស្ពៃមិនខាន។ យើងសូមលើកពីកាដូ ៥ យ៉ាង ដែលបុរសខិលខូច តែងត្រៀមសម្រាប់ធ្វើជានុយ។
១. ទើបស្គាល់គ្នា តែឱ្យកាដូថ្លៃៗ
ស្គាល់គ្នារយៈពេលខ្លី តែគេនឹងឱ្យកាដូជារបស់ប្រើថ្លៃៗ ដូចជា គ្រឿងអលង្ការ ទឹកអប់ប្រ៊េន កាបូបប្រ៊េន ឬ ជាកញ្ចប់ដំណើរកម្សាន្តលំដាប់។ អាចថានេះជាការបោះទុនមួយ ដែលនឹងធ្វើឱ្យអ្នកមានអារម្មណ៍ថា ចាំបាច់ត្រូវតែតបស្នងបែបធំដុំទៅគេវិញ។ កាលណាគេបោះទុនធំ គេប្រាកដជាសម្លឹងផលចំណេញធំមិនខាន។
២. កាដូក្លែមសារបង្កប់ន័យ
កាដូជាថ្នាំបន្ទន់ចិត្តនារីៗ ហើយថែមលើសពីនេះ បុរសអាចនឹងក្លែមពាក្យពេចន៍បន្ថែម ដោយភ្ជាប់មកជាមួយការសរសេរដាក់នៅលើកាដូ ឬសារ ដែលបង្ហាញពីន័យរំពឹងចង់បានអ្វីមួយពីអ្នកទៅវិញ ឧទាហរណ៍ «បងបានធ្វើវាដើម្បីអូន អីចឹង អូនកុំភ្លេចធ្វើដើម្បីបងផងណា!»។ ចងចាំថា ការឱ្យកាដូជាការបង្ហាញពីទឹកចិត្ត មិនមែនដើម្បីរំពឹងបានអ្វីមកវិញឡើយ។
៣. សុំឱ្យកាដូនៅកន្លែងសម្ងាត់ ឬ ឯកជន
ប្រសិនបើបុរសទទូចចង់ឱ្យកាដូនៅកន្លែងស្ងាត់ឬកន្លែងឯកជន ភាគច្រើនបំណងរបស់គេ គឺចង់បានភាពស្និទ្ធស្នាលកៀកកិតខ្លួនប្រាណ ជាជាងបង្ហាញការស្រលាញ់។
៤. កាដូប៉ាវគ្រប់យ៉ាង
បុរសខ្លះហ៊ានជះលុយដើម្បីបានតាមបំណង ព្រោះគេគិតថាសម័យនេះ តែហ៊ានជះលុយ ដៃគូនឹងព្រមប្រគល់គ្រប់យ៉ាង។ គេនឹងមិនឱ្យជាកាដូ តែគេនឹងផ្តល់កាដូជាការរ៉ាប់រងលើការចំណាយក្នុងថ្ងៃពិសេសតែម្តង។ បានន័យថា អ្នកចង់បានអ្វី គេនឹងជូនអ្នកទៅទិញរបស់នោះ។ ក្រោយបានរបស់រួចរាល់ អ្នកនឹងមានអារម្មណ៍ចំពាក់គុណ ហើយត្រូវតែតបស្នងគេវិញ។ បើអ្នកមិនព្រម គេនឹងរំលើកអំពីការលះបង់ការចំណាយរបស់គេ។
៥. កាដូគោលបំណង
ជាកាដូបែបគម្រោងសម្រាប់ទៅកន្លែងណាមួយជាមួយគ្នា ដូចជាដំណើរកម្សាន្តដាច់យប់ ទៅលម្ហែនៅរីសត សំបុត្រខនសឺតនៅក្រៅប្រទេស ឬកម្មវិធីពិសេសៗ ដែលតម្រូវស្នាក់នៅ។ ចុះបើស្នាក់នៅ ជឿអត់ថាគេនឹងមិនមានបំណងអ្វីលើអ្នក?៕
