នៅថ្ងៃទី ១៦ ខែមីនា ឆ្នាំ ២០២៥ បេឡាជាតិសន្តិសុខសង្គម បានលើកឡើងពីអត្ថប្រយោជន៍សំខាន់ៗចំនួន ៤ សម្រាប់បុគ្គល ដែលជាបុគ្គលិកក្រុមហ៊ុនឯកជន ក្លាយជាសមាជិក ប.ស.ស. និង មានប័ណ្ណ ប.ស.ស. រួចរាល់។
ចំពោះអត្ថប្រយោជន៍ ដែលសមាជិក ប.ស.ស ជាបុគ្គលិកក្រុមហ៊ុនឯកជន នឹងទទួលបាននោះមានដូចជា ៖
១. ពេលឈឺ នោះ ប.ស.ស. នឹងរ៉ាប់រងលើថ្លៃព្យាបាលរហូតដល់ជាសះស្បើយ និង ផ្ដល់ប្រាក់ឧបត្ថម្ភផ្សេងៗ។
២. ពេលមានផ្ទៃពោះ ទទួលបានការធានារ៉ាប់រងលើសេវាថែទាំសុខភាព មុន និង ក្រោយសម្រាល ទទួលបានសេវាថ្លៃសម្រាល ជាមួយនឹងប្រាក់បំណាច់ប្រចាំថ្ងៃ ៧០% នៃប្រាក់ឈ្នួលជាប់ភាគទានប្រចាំថ្ងៃ រយៈពេល ៩០ ថ្ងៃ ព្រមទាំងប្រាក់ឧបត្ថម្ភបន្ថែមពីរាជរដ្ឋាភិបាល និង ប្រាក់ពិនិត្យសុខភាពម្តាយ និង កូន។
៣. ប្រសិនបើមានគ្រោះថ្នាក់ ឬ បាត់បង់ជីវិត ដោយសារគ្រោះថ្នាក់ការងារ នោះ ប.ស.ស. នឹងធានារ៉ាប់រងលើសេវាសង្គ្រោះបន្ទាន់ ការព្យាបាល និង ថែទាំ ផ្ដល់ប្រាក់ឧបត្ថម្ភផ្តល់ប្រាក់វិភាជន៍បូជាសព រួមទាំងអត្ថប្រយោជន៍របបសន្តិសុខសង្គមផ្សេងៗជាច្រើនទៀត ស្របទៅតាមច្បាប់ស្តីពីរបបសន្តិសុខសង្គម។
៤. នឹងទទួលបានប្រាក់សោធនជរាភាព (ប្រាក់រ៉ឺត្រែត) បន្ទាប់ពីចូលនិវត្តន៍ក្រោយអាយុ ៦០ ឆ្នាំ។
សម្រាប់ព័ត៌មានបន្ថែម សូមទំនាក់ទំនងទៅកាន់លេខ ១២៩៧ ឬ ១២៨៦ ឬតាមរយៈប្រព័ន្ធផ្សព្វផ្សាយបណ្តាញសង្គមរបស់បេឡាជាតិសន្តិសុខសង្គម៕
ប្រភព ៖ បេឡាជាតិសន្តិសុខសង្គម
