កុំមើលរំលង! កូនៗណាដែលស្ត្រេសរុំារ៉ៃ ភ័យខ្លាច រងអំពើហិង្សា អាចបណ្តាលឱ្យលែងលូតកម្ពស់

នៅក្នុងជីវិតរស់នៅប្រចាំថ្ងៃ សុខភាពផ្លូវកាយ និង ផ្លូវចិត្ត ត្រូវបានរងការប៉ះទង្គិចពីកត្តាជាច្រើន ដែលធ្វើឱ្យប៉ះពាល់ដល់ការលូតលាស់ និង អភិវឌ្ឍន៍រាងកាយ។ ក្នុងនោះរាប់បញ្ចូលកត្តា សង្គម សេដ្ឋកិច្ច នយោបាយ និង អារម្មណ៍ ដែលវាតែងតែមកគ្របដណ្តប់លើយើងគ្រប់ពេល។ ទន្ទឹមនឹងផ្តល់ផលវិជ្ជមានដល់រាងកាយ កត្តាទាំងនេះវាក៏ផ្តល់ផលអវិជ្ជមានធ្វើឱ្យយើងប្រឈមបញ្ហាមួយចំនួនដូចជា៖ ភាពក្រីក្រ បាត់បង់ការស្រលាញ់ អសុវត្ថិភាព និង ភ័យខ្លាចការបាត់បង់…ជាដើម ដែលយូរៗទៅ វានឹងធ្វើឱ្យយើងមានអារម្មណ៍ស្ត្រេសជាប្រចាំឬហៅថាស្ត្រេសរុំារ៉ៃ (Chronic Stress)។

អារម្មណ៍ស្ត្រេសរុំារ៉ៃ ឬ អារម្មណ៍តានតឹងរុំារ៉ៃ អាចធ្វើឱ្យមានការផ្លាស់ប្តូរជីវសាស្ត្រផ្សេងៗនៅក្នុងរាងកាយ។ ក្នុងនោះរាប់តាំងពីការកែប្រែកម្រិតកោសិកា រហូតដល់ផ្លាស់ប្តូរកម្រិតអ័រម៉ូន ហើយវាក៏រួមចំណែកបង្កបញ្ហាសុខភាពជាច្រើនចំពោះមនុស្សវ័យជំទង់ផងដែរ។ បើសម្រាប់កុមារវិញ អារម្មណ៍ស្ត្រេសរុំារ៉ៃ ឬ អារម្មណ៍តានតឹងរុំារ៉ៃ អាចធ្វើឱ្យពួកគេលូតកម្ពស់យឺត ឬ រហូតដល់លែងលូតកម្ពស់។

ភាពស្ត្រេសរុំារ៉ៃរបស់កុមារមិនខុសប៉ុន្មានឡើយពីមនុស្សធំ ពួកគេអាចស្ត្រេសដោយសារបញ្ហាមួយចំនួនរួមមាន៖ ការរស់នៅក្នុងភាពភ័យខ្លាច ការបាត់បង់ក្តីស្រលាញ់ពីឪពុកម្តាយ និង មនុស្សជុំវិញខ្លួន ការរស់នៅក្នុងអំពើហិង្សា ការស្អប់ខ្ពើម ឬ រើសអើងពីអ្នកដទៃ និង អារម្មណ៍រងសម្ពាធផ្សេងៗ។

តាមរយៈសាស្ត្រាចារ្យ Barry Bogin អ្នកជំនាញផ្នែកជីវវិទ្យានៅសាកលវិទ្យាល័យ Loughborough នៅចក្រភពអង់គ្លេស បានលើកឡើងថា ប្រសិនបើយើងរស់នៅក្នុងភាពភ័យខ្លាច និង អារម្មណ៍តានតឹងច្រើន វានឹងធ្វើឱ្យរាងកាយបង្កើតអ័រម៉ូនស្ត្រេស (stress hormones)។ ករណីអ័រម៉ូនស្ត្រេសកើនឡើងខ្ពស់រៀងរាល់ថ្ងៃ វានឹងបញ្ឈប់ឆ្អឹងពីការលូតលាស់។ តួយ៉ាង វានឹងរារាំងការផលិតអ័រម៉ូនចំនួនពីរ ដែលមានថាមពលជួយដល់ការលូតលាស់ឆ្អឹងគឺ អ័រម៉ូនលូតលាស់ ឬហៅថា growth hormone និង មួយទៀត អ័រម៉ូនជួយលូតលាស់ឆ្អឹង និង ជាលិកាហៅថា IGF-1 ។ ជាការពិតណាស់ ការកង្វះអ័រម៉ូនទាំងពីរនេះ អាចបញ្ឈប់ទៅដល់ការលូតកម្ពស់របស់កុមារ។

អ្នកជំនាញជាច្រើនបានផ្តល់ដំបូន្មាន ដើម្បីបញ្ចៀសកុមារពីបញ្ហានេះ អាណាព្យាបាលចាំបាច់ត្រូវសង្កេត និង រិះរកវិធីរំដោះពួកគេចេញពីភាពភ័យខ្លាច និង ហិង្សាដែលបង្កជាអារម្មណ៍រងសម្ពាធ ឬ ស្ត្រេសដល់ពួកគេ។ ព្យាយាមឱ្យកុមាររស់នៅប្រកបដោយភាពរីករាយ  និង សកម្មរាងកាយដូចជាការលេងកីឡា និង ធ្វើលំហាត់ប្រាណជាដើម។ ទន្ទឹមគ្នានេះ ត្រូវផ្តល់របបអាហារ ដែលមានសារធាតុចិញ្ចឹមគ្រប់គ្រាន់សម្រាប់ការលូតលាស់ និង អភិវឌ្ឍន៍ផងដែរ៕

ប្រភព៖ loughboroughuniversity