ថ្មីៗនេះ តាមរយៈផេក សម្ដេចព្រះព្រហ្មរតនមុន្នី ពិន សែម សិរីសុវណ្ណោ បានជូនដំណឹងដល់ពុទ្ធបរិស័ទទាំងអស់ ចូលរួមជ្រះថ្លាអនុមោទនា ក្នុងកម្មពិធីបុណ្យ «ទក្ខិណានុប្បទាន» ដើម្បីជូនបុណ្យចំពោះវីរកងទ័ពខ្មែរ និង ឧទ្ទិសកុសលជូនចំពោះវិញ្ញាណក្ខន្ធវីរកងទ័ព ដែលបានពលីជីវិត ក្នុងបុព្វហេតុជាតិ ការពារបូរណភាពទឹកដី។
កម្មវិធីបុណ្យ «ទក្ខិណានុប្បទាន» នេះ នឹងចាប់ផ្ដើមកម្មវិធីបុណ្យ នៅថ្ងៃសុក្រ ៦កើត ខែភទ្របទ ឆ្នាំម្សាញ់ សប្ដស័ក ព.ស.២៥៦៩ ត្រូវនឹងថ្ងៃទី ២៩ ខែសីហា ឆ្នាំ ២០២៥ ចាប់ពីម៉ោង ៨៖០០ ព្រឹកតទៅ ខណៈទីតាំងប្រារព្ធពិធីបុណ្យ គឺស្ថិតនៅក្នុងវត្តរាជបូណ៌ ស្ថិតក្នុងភូមិវត្តបូព៍ សង្កាត់សាលាកំរើក ក្រុងសៀមរាប ស្ថិតក្នុងខេត្តសៀមរាប។
ក្នុងន័យនេះ ព្រះអង្គបានគោរពអញ្ជើញ ពុទ្ធបរិស័ទទាំងក្នុង និង ក្រៅប្រទេស ចូលរួមជ្រះថ្លាអនុមោទនាបុណ្យ ឱ្យបានគ្រប់ៗគ្នា៕
