អ្នកគាំទ្រក្រុមតារាចម្រៀង K-Pop ល្បីល្បាញរបស់ប្រទេសកូរ៉េខាងត្បូង 2NE1 ច្បាស់ជាបានជ្រាបមកហើយពីការវិលត្រឡប់ជាក្រុមជាថ្មីរបស់សមាជិកទាំង ៤ បន្ទាប់ពីរំសាយក្រុមអស់រយៈពេលជាច្រើនឆ្នាំ។ ក្នុងការវិលត្រឡប់នេះដែរ 2NE1 បានបង្ហាញវត្តមានក្នុងការប្រគំតន្ត្រីទេសចរ តាមបណ្តាប្រទេសមួយចំនួនរួចហើយដែរ។
យ៉ាងណាមិញ អ្វីដែលកាន់តែរំភើបសម្រាប់អ្នកគាំទ្រកម្ពុជានោះ នៅថ្ងៃទី ០៥ ខែកក្កដា ឆ្នាំ ២០២៥ ខាងមុខនេះ ក្រុមចម្រៀង K-Pop ដ៏ល្បីខាងលើនេះ ក៏នឹងមានវត្តមានក្នុងការសម្តែងនៅក្នុងប្រទេសកម្ពុជាក្នុងការប្រគំតន្ត្រី GANZBERG SUPER IDOL- I AM THE BEST ផងដែរ។
ជាក់ស្តែង ក្រោយការរង់ចាំអស់រយៈពេលជាច្រើនឆ្នាំរបស់អ្នកគាំទ្រកម្ពុជា នៅព្រឹកថ្ងៃទី ១០ ខែមិថុនា ឆ្នាំ ២០២៥ នេះ សំបុត្រនៃការប្រគំតន្ត្រីខាងលើបានដាក់លក់ជាផ្លូវការមិនដល់ ១ ម៉ោងផង អស់គ្រប់ប្រភេទសំបុត្រ ដែលធ្វើឱ្យអ្នកទិញមិនបានមានការខូចចិត្តជាខ្លាំង។
ភ្លាមនោះ ក្រោយការដាក់លក់សំបុត្រជាផ្លូវការរបស់ក្រុមហ៊ុន GanzBerg និង Live by Wonderpass អស់រួចរាល់ គេសង្កេតឃើញមានអ្នកគាំទ្រជាច្រើនត្រូវការសំបុត្រ Resell ដែលជាឱកាសសម្រាប់ជនខិលខូច។ ជាក់ស្តែង ភ្លាមៗគេឃើញនៅលើបណ្តាញសង្គមហ្វេសប៊ុក មានអ្នកត្រូវបានគេឆបោកឱ្យបាញ់លុយ ហើយ Block Chat បាត់ ដោយអស់ទាំងលុយ ឯសំបុត្រក៏មិនបាន៕
