មហាជនអ្នកប្រើប្រាស់បណ្ដាញសង្គម បាននាំគ្នាចែករំលែកទុកជាមេរៀន បន្ទាប់ពីមានករណីផ្ទុះថ្មចេញពីក្នុងកែបម៉ូតូមួយគ្រឿង ចេញភ្លើង និង ហុយផ្សែងទ្រលោម ស្ថិតនៅចំណុចមុខហាងទូរស័ព្ទមួយកន្លែង។
ទាក់ទិនទៅនឹងករណីនេះ នៅថ្ងៃទី ០៩ ខែកក្កដា ឆ្នាំ ២០២៥ តាមរយៈគណនីដែលមានឈ្មោះ ម៉េងហេង លក់គ្រឿងបន្លាស់ទូរស័ព្ទ បានបង្ហោះវីដេអូថតជាប់ដោយកាមេរ៉ាសុវត្ថិភាព បង្ហាញពីសកម្មភាព បុរសម្នាក់ឈរសុខៗ ស្រាប់តែឮសំឡេងផ្ទុះ និង ចេញភ្លើងពីក្រោមកែបម៉ូតូ Scoopy ពណ៌ខ្មៅមួយគ្រឿង លុះបើកកែបមើល ទើបហុយផ្សែងទ្រលោម បង្កជាការភ្ញាក់ផ្អើល។
តាមរយៈវីដេអូនេះ ម្ចាស់គណនីបានភ្ជាប់ជាមួយសារឱ្យមហាជនប្រុងប្រយ័ត្នថា ៖ «ប្រយ័ត្នទាំងអស់គ្នាបងប្អូនយេីង កុំទុកទូរស័ព្ទ ឬ ថ្មផ្សេងៗក្រោមកែបម៉ូតូ ព្រោះយេីងធ្វេីដំណេីរទៅវាក្ដៅក្នុងហ្នឹង ធ្វើឱ្យផ្ទុះឆេះ (ជួយស៊ែរចែកបងប្អូនយេីងបានឃេីញផង)»៕
