ហៅគ្រូចិនសែមករៀបចំជំនាងផ្ទះយកហុងស៊ុយអស់ម៉ឺនដុល្លារ រៀបចុះឡើងមុខរបររលំរលាយ តាមពិតមកពីចិនសែលួចដាក់អំពើ

មានករណីមួយនៅប្រទេសថៃ ដោយមានគ្រួសារមួយបានហៅគ្រូចិនសែមករៀបចំជំនាងផ្ទះឱ្យដើម្បីយកហុងស៊ុយល្អ ចុងក្រោយមុខរបររកស៊ីដុនដាបទៅៗ ទើបដឹងថាចិនសែលួចធ្វើអំពើដាក់។

តាមព័ត៌មានបានឱ្យដឹងថា កាលពី ២ ឆ្នាំមុន បុរសជាមេគ្រួសារបានទៅស្គាល់គ្នាជួបនឹងគ្រូចិនសែម្នាក់ ហើយបានសុំឱ្យចិនសែនោះមកជួយរៀបចំជំនាងផ្ទះ។ ក្រោយមកបុរសរូបនេះក៏កាន់តែជិតស្និទ្ធជាមួយនឹងចិនសែ ហើយបានចំណាយលុយអស់ជារាប់ម៉ឺនដុល្លារ ដើម្បីធ្វើពិធីផ្សេង និង យកវត្ថុស័ក្តិសិទ្ធិជាច្រើនពីចិនសែនោះមកគោរពបូជានៅផ្ទះ។

មិនយូរប៉ុន្មាន ស្រាប់តែមុខរបរដែលរកស៊ីប្រចាំគ្រួសារក៏ធ្លាក់ដុនដាប រហូតដល់ជិតរលំរលាយ ក្រោយមកទើបអ្នកផ្ទះទៅគាស់ហឹបដែលចិនសែធ្លាប់កប់នៅក្នុងបរិវេណផ្ទះ ក៏ឃើញថាមានសុទ្ធតែរូបតុក្កតាតូចៗ អំបែងពាង ខ្សែដៃចាស់ៗ ខ្សែក្រវាត់បុរាណ និង មាសក្លែងក្លាយ ដែលរបស់ទាំងអស់នេះ មិនធ្លាប់ឃើញចិនសែដាក់ចូលនោះទេ។ យ៉ាងណាមិញ ពេលនេះគ្រួសារមួយនេះកំពុងតែអំពាវនាវរកអ្នកមកជួយដោះអំពើនេះចេញ ដើម្បីស្រោចស្រង់មុខរបរឡើងវិញផងដែរ៕

ប្រភព៖ AMARINTV