កាលពីថ្ងៃទី ២៦ ខែមីនា ឆ្នាំ ២០២៥ កន្លងទៅ មន្ទីរសុខាភិបាលរាជធានីភ្នំពេញ បានចេញសេចក្តីបំភ្លឺព័ត៌មាន ក្រោយមានម្ចាស់គណនីបណ្តាញសង្គមហ្វេសប៊ុកមួយរូប មានឈ្មោះថា Mommy Natural បានបង្ហោះរូបភាព វីដេអូ និង ខ្លឹមសារចំណងជើង (Caption) ថា ៖ «ចែករំលែក ស៊ែរយកបុណ្យផងបងប្អូន ដើម្បីឱ្យអ្នកដែលកាត់ប្រម៉ាត់រួចដូចខ្ញុំបានដឹង ព្រោះល្អណាស់ជាបទពិសោធផ្ទាល់តែម្តង។ ធ្មេចបើកៗខ្ញុំបាត់បង់ប្រម៉ាត់ ១ ឆ្នាំ ៧ ខែហើយ តែសុខភាពខ្ញុំល្អជាធម្មតា ញ៉ាំអីបានគ្រប់យ៉ាងមិនមានតមអ្វីទាំងអស់ ដោយសារញ៉ាំប្រម៉ាត់ទាកាប៉ាស្រស់ៗនេះឯង»។
ទាក់ទិនទៅនឹងរឿងនេះ ខាងមន្ទីរសុខាភិបាលបានឱ្យដឹងថា តាមរយៈវីដេអូរៀបរាប់របស់ម្ចាស់ផេកខាងលើ ពាក់ព័ន្ធនឹងការលេបប្រម៉ាត់ទាកាប៉ាស្រស់ មន្ទីរសុខាភិបាល សូមជម្រាបបញ្ជាក់ថា គិតមកដល់ពេលបច្ចុប្បន្ននេះ ពុំទាន់មានការសិក្សាស្រាវជ្រាវណាមួយ ដែលបង្ហាញពីលទ្ធផលប្រសិទ្ធភាព នៃការលេបប្រម៉ាត់ទាកាប៉ាស្រស់ ដើម្បីព្យាបាល និង ជំនួយសុខភាពសម្រាប់អ្នកជំងឺកាត់ប្រម៉ាត់នោះទេ។
ក្នុងនោះ មន្ទីរសុខាភិបាល ក៏បានទទូចស្នើសុំដល់ម្ចាស់ម្ចាស់ផេក Mommy Natural មេត្តាលុបចោលនូវរូបភាពវីដេអូ និង ខ្លឹមសារ Caption ជៀសវាងមានការភាន់ច្រឡំ ព្រមទាំងអំពាវនាវដល់សាធារណជនប្រើប្រាស់បណ្តាញសង្គមទាំងអស់ សូមមេត្តាបញ្ឈប់ការផ្សព្វផ្សាយចែករំលែកបន្តនូវព័ត៌មានខាងលើ៕
សូមអានសេចក្ដីលម្អិតនៅខាងក្រោម ៖
