នៅថ្ងៃទី ១២ ខែមីនា ឆ្នាំ ២០២៥ តាមរយៈឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានចែករំលែកចំណេះដឹងទូទៅពាក់ព័ន្ធទៅនឹងដំណោះស្រាយចំពោះអត្តសញ្ញាណប័ណ្ណដែលជិតផុតសុពលភាព ដែលគប្បីរួសរាន់ទៅធ្វើថ្មី។
ក្នុងនោះ ឯកឧត្តមអគ្គនាយករង នៃអគ្គនាយកដ្ឋានអត្តសញ្ញាណកម្ម បានបញ្ជាក់ឱ្យបានដឹងថា ៖ «ហេតុអ្វីត្រូវរង់ចាំដល់ផុតសុពលភាព ទើបមកធ្វើ? អត្តសញ្ញាណប័ណ្ណសញ្ជាតិខ្មែរ អាចថតធ្វើមុនផុតសុពលភាព ក្រោម ១៨០ ថ្ងៃ (៦ខែ) បាន ដោយតម្រូវយកតែអត្តសញ្ញាណប័ណ្ណចាស់នោះ ឬ បើបាត់ត្រូវមានពាក្យបណ្តឹងបាត់ពីប៉ុស្តិ៍នគរបាល»។
យ៉ាងណាមិញ ចំពោះទីតាំងផ្តល់សេវាអត្តសញ្ញាណប័ណ្ណសញ្ជាតិខ្មែរ អាចធ្វើនៅប៉ុស្តិ៍នគរបាលរដ្ឋបាលឃុំ សង្កាត់ ឬ អធិការដ្ឋាននគរបាលក្រុង ស្រុក ខណ្ឌ ឬ ស្នងការដ្ឋាននគរបាលរាជធានី ខេត្ត ឬ នៅនាយកដ្ឋានអត្តសញ្ញាណប័ណ្ណសញ្ជាតិខ្មែរ ឬ នៅសាខាអត្តសញ្ញាណប័ណ្ណផ្សារទំនើប AEON2 និង ប.ស.ស៕
