ថ្មីៗនេះ តាមរយៈឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានមានប្រសាសន៍ឱ្យដឹងថា អត្តសញ្ញាណប័ណ្ណសញ្ជាតិខ្មែរ អាចថតធ្វើមុនផុតសុពលភាពក្រោម ១៨០ ថ្ងៃ (៦ខែ) បាន ខណៈបើផុតសុពលភាព គឺមិនអាចប្រើប្រាស់ជាផ្លូវការក្នុងការស្នើសុំសេវាផ្សេងៗបានទេ ដូច្នេះសូមកុំរង់ចាំដល់ពេលផុត ឬ ត្រូវការប្រើទើបទៅធ្វើ។
ក្នុងនោះ ឯកសារយោងសម្រាប់ស្នើសុំរួមមាន ៖
– អត្តសញ្ញាណប័ណ្ណសញ្ជាតិខ្មែរដែលអស់សុពលភាព
– ករណីបាត់បង់អត្តសញ្ញាណប័ណ្ណសញ្ជាតិខ្មែរ ត្រូវមានពាក្យបណ្តឹង
– ករណីប្តូរអាសយដ្ឋានត្រូវមាន សៀវភៅស្នាក់នៅ ឬសៀវភៅគ្រួសារ (មានបញ្ជាក់នីត្យានុកូលកម្ម) ឬ លិខិតបញ្ជាក់ទីលំនៅ។
ដោយឡែក ទីកន្លែងសម្រាប់ស្នើសុំរួមមាន ៖
– ប៉ុស្តិ៍នគរបាលរដ្ឋបាលឃុំ សង្កាត់ នៃលំនៅឋានរបស់ខ្លួនកំពុងរស់នៅ
– អធិការដ្ឋាននគរបាលក្រុង ស្រុក ខណ្ឌ នៃលំនៅឋានរបស់ខ្លួនកំពុងរស់នៅ
– ស្នងការដ្ឋាននគរបាលរាជធានី-ខេត្ត នៃលំនៅឋានរបស់ខ្លួនកំពុងរស់នៅ
– ស្នាក់ការផ្តល់អត្តសញ្ញាណប័ណ្ណសញ្ជាតិខ្មែរ បេឡាជាតិសន្តិសុខសង្គម (បសស) សម្រាប់កម្មករនិយោជិត
– ស្នាក់ការផ្តល់អត្តសញ្ញាណប័ណ្ណសញ្ជាតិខ្មែរផ្សារអ៊ីអនម៉ល សែនសុខ
– ស្នាក់ការផ្តល់អត្តសញ្ញាណប័ណ្ណសញ្ជាតិខ្មែរផ្សារអីអនម៉ល មានជ័យ
– នាយកដ្ឋានអត្តសញ្ញាណប័ណ្ណសញ្ជាតិខ្មែរ៕
