ក្រសួងសាធារណការ និង ដឹកជញ្ជូន បានបង្ហោះសារចែករំលែកចំណេះដឹងតាមរយៈបណ្ដាញទំនាក់ទំនងសង្គមហ្វេសប៊ុក ស្ដីពី មន្ត្រីនគរបាលចរាចរណ៍ផ្លូវគោក មានសិទ្ធិដកប័ណ្ណបើកបរព្យួរទុកក្នុងរយៈពេលមិនលើសពី ៧ ថ្ងៃ។
ក្នុងនោះ ក្រសួងបានបញ្ជាក់ថា យោងតាមច្បាប់ស្តីពីចរាចរណ៍ផ្លូវគោកមាត្រា ៦២ បានចែងថា ៖ មន្ត្រីនគរបាលចរាចរណ៍ផ្លូវគោក មានសិទ្ធិដកប័ណ្ណបើកបរព្យួរទុកក្នុងរយៈពេលមិនលើសពី ៧ (ប្រាំពីរ) ថ្ងៃ និង ដកពិន្ទុ ដូចមានចែងក្នុងមាត្រា ៤៣ នៃច្បាប់នេះ ចំពោះបទល្មើសណាមួយដូចខាងក្រោម ៖
១. បើកបរខុសទិសចរាចរណ៍ ឬ បើកបរតាមទិសចរាចរណ៍ដែលមានដាក់សញ្ញាហាមឃាត់
២. បើកបរដោយល្បឿនលើសចាប់ពី ៤០ (សែសិប) គីឡូម៉ែត្រក្នុងមួយម៉ោងឡើងទៅ ពីល្បឿនដែលបានកំណត់ក្នុងច្បាប់នេះ
៣. មិនគោរពសិទ្ធិអាទិភាព
៤. មិនគោរពផ្លាកសញ្ញាឈប់ ឬ ភ្លើងសញ្ញាចរាចរណ៍ពណ៌ក្រហម ឬ ពណ៌ក្រហមភ្លឹបភ្លែតៗ
៥. បើកបរយានដែលមានកង់ច្រវាក់ដែកផ្ទាល់នៅលើផ្លូវថ្នល់ក្រាលកៅស៊ូ។
ក្រសួងសាធារណការ និង ដឹកជញ្ជូន បានឱ្យដឹងបន្ថែមថា មន្ត្រីនគរបាលចរាចរណ៍ មិនត្រូវដកហូតប័ណ្ណបើកបរ និង ឯកសារផ្សេងៗរបស់យានយន្ត ក្នុងករណីពុំមានចែងក្នុងច្បាប់ខាងលើនេះ៕
