មហាជននិយមតាមដានព័ត៌មានពាក់ព័ន្ធនឹងកុមារា ឆលី ដែលមានដុះសាច់មហារីក ដោយប្រើពេលព្យាបាល ដោយការវះកាត់ និង ចាក់គីមីអស់រយៈពេលជាច្រើនឆ្នាំកន្លងមកនោះ ថ្មីៗនេះ កំពុងផ្ទុះការព្រួយបារម្ភជាថ្មី ខណៈអ្នកម្តាយរបស់ ឆលីបានឱ្យដឹងថា ដុំសាច់វះកាត់នោះ បានដុះឡើងវិញ ក្រោយវះកាត់បាន ២ ខែកន្លះ។
យ៉ាងណាមិញ នៅយប់ថ្ងៃទី ១៥ ខែមិថុនា ឆ្នាំ ២០២៥ កន្លងទៅ អ្នកម៉ាក់របស់កុមារា ឆលី បានបង្ហោះសារប្រាប់ពីស្ថានភាពជំងឺរបស់កូន ដែលត្រូវបញ្ជូនទៅកាន់មន្ទីរពេទ្យភ្លាមៗ ដោយ ឆលី ងងឹតមុខមើលអ្វីមិនឃើញ និង ក្អួតមិនឈប់ រហូតដល់ថ្ងៃទី ១៦ ខែមិថុនា ឆ្នាំ ២០២៥ នេះ អ្នកម៉ាក់របស់ ឆលី ក៏បានបង្ហោះសារបញ្ជាក់ជាថ្មីថា ពេលនេះ ឆលី បានធ្វើដំណើរទៅកាន់មន្ទីរពេទ្យនៅព្រំដែនហើយ។
ក្នុងនោះដែរ គេក៏បានឃើញតារាចម្រៀង ពេជ្រ សូលីកា បានប្រកាសពីដំណឹងសុខភាពរបស់ ឆលី ទៅកាន់មហាជន និង បានអំពាវនាវដល់សប្បុរសធម៌បរិច្ចាគថវិកាដើម្បីជួយដល់ ឆលី ផង។ អ្នកនាង ពេជ្រ សូលីកា បានរៀបរាប់ថា៖ «នៅពេលដែលមីងទទួលដំណឹងថាក្មួយវះកាត់ទទួលបានជោគជ័យ មីងពិតជារំភើបសប្បាយចិត្តជំនួសក្មួយខ្លាំងណាស់កូន។ មីងពិតជាចង់ឃើញក្មួយ ធំធាត់រស់នៅដូចក្មេងគេដទៃ ចង់លេងអ្វីដែលក្មួយចង់លេង ចង់ញុំអ្វីដែលក្មួយចង់ញុំ។ ប៉ុន្តែគ្រាន់តែមីងទទួលបានដំណឹងទាំងយប់ មីងមានការតក់ស្លុតចិត្តជាខ្លាំង ក្មេងតូចដ៏អភ័ព្វរបស់មីង ដុំសាច់ ឆលី (ដុះឡើងមកវិញ) ត្រូវការសង្គ្រោះជាបន្ទាន់។ ក្នុងវ័យមួយ ដែលត្រូវទៅសាលា ត្រូវមានមិត្តភក្កិដូចក្មេងដទៃ ចង់ញ៉ាំអ្វីដែលខ្លួនចង់ តែមិនអាច។ សំណេរមួយនេះ នាងខ្ញុំចង់អំពាវនាវទៅដល់បងប្អូនទាំងអស់គ្នា ជួយទៅដល់ក្មេងប្រុសម្នាក់នេះ តាមលទ្ធភាព ដែលបងប្អូនអាចជួយបានដោយក្តីស្រឡាញ់ ដែលបងប្អូនមានចំពោះ ឆលី លេខទាក់ទងម៉ាក់ឆលី 069 888 066 / 014 888 066 ABA 000 547 860 | USD Hengly ENG»៕
