កាលពីថ្ងៃទី ១៥ ខែមិថុនា ឆ្នាំ ២០២៥ កន្លងទៅនេះ មានករណីអគ្គិភ័យមួយ បានឆាបឆេះនៅក្នុងវត្តមួយកន្លែងនៅឯប្រទេសថៃ បង្កជាការភ្ញាក់ផ្អើលអស់ចំណុះជើងវត្តនាំគ្នាមកជួយពន្លត់ តែទប់មិនឈ្នះ។
តាមព័ត៌មានបានឱ្យដឹងថា ហេតុការណ៍ខាងលើនេះបានកើតឡើងនៅវត្ត Hat Pu Dai ដែលស្ថិតនៅឃុំ Na Saeng ស្រុក Ko Kha ខេត្ត Lampang។ អគ្គិភ័យបានចាប់ផ្តើមឆាបឆេះនៅកុដិមួយខ្នងនៅក្នុងវត្ត ហើយខាងអ្នកភូមិបាននាំគ្នាមកជួយពន្លត់ដែរ តែដោយសារតែកុដិជាកុដិឈើលើថ្មក្រោម ទើបបណ្តាលឱ្យមានការឆាបឆេះកាន់តែលឿន។
យ៉ាងណាមិញ ខាងអាជ្ញាធរបានចុះមកអន្តរាគមន៍ពន្លត់ ដោយប្រើពេលអស់ជាង ១ ម៉ោង ទើបអាចពន្លត់ភ្លើងទាំងអស់បាន តែគួរឱ្យសោកស្តាយ កុដិបានក្លាយជាចំណីភ្លើងទាំងអស់។ ដោយឡែក ចំណែកមូលហេតុនៃការឆេះវិញ ត្រូវបានគេសន្និដ្ឋានថា អាចបណ្តាលមកពីការទុស្សេចរន្តអគ្គិសនី៕
ប្រភព៖ Khaosod
