ថ្មីៗនេះ កីឡាករប្រដាល់ MMA ម្នាក់ ឈ្មោះថា Jake Sendler បានបាត់បង់ជីវិតទាំងវ័យត្រឹមតែ ២១ ឆ្នាំ ដោយសារតែការខំសម្រុកហាត់ប្រាណឱ្យស្រកបាន ៦ គីឡូ ក្នុងរយៈពេល ២ ថ្ងៃ ដើម្បីឱ្យទាន់ការប្រកួត។
តាមព័ត៌មានបានឱ្យដឹងថា ដោយសារតែនៅសល់តែ ២ ថ្ងៃទៀត ត្រូវឡើងប្រកួត Jake ក៏បានសម្រុកខំហាត់ប្រាណយ៉ាងខ្លាំង ដើម្បីសម្រកទម្ងន់ឱ្យបាន ៥ ទៅ ៦ គីឡូ។ Jake ហាត់ទាល់តែមានការឈឺសាច់ដុំ និង មានការប្រែពណ៌ទឹកនោមខុសធម្មតា តែក៏នៅតែទ្រាំឡើងទៅប្រកួត ដែលធ្វើអាការៈកាន់តែធ្ងន់ធ្ងរ និង ត្រូវបានគេបញ្ជូនទៅសង្រ្គោះនៅមន្ទីរពេទ្យ តែជាអកុសលខាងគ្រូពេទ្យមិនអាចជួយបានឡើយ។
តាមព័ត៌មានបានឱ្យដឹងទៀតថា Jake បានខូចសាច់ដុំធ្ងន់ធ្ងរ ឬ Rhabdomyolysis ហើយបង្កទៅជាការខូចក្រលៀន ព្រមទាំងបានប៉ះពាល់ទៅដល់សរីរាង្គផ្សេងៗទៀតនៅក្នុងរាងកាយ បួករួមជាមួយការព្យាបាលមិនទាន់ពេលវេលា ទើបបណ្តាលឱ្យ Jake បានបាត់បង់ជីវិត ដែលនេះពិតជាគួរឱ្យសោកស្តាយជាខ្លាំង ព្រោះ Jake គឺជាធនធានកីឡាករវ័យក្មេងមួយរូប ដែលមានអនាគតវែងឆ្ងាយ៕
ប្រភព៖ DailyNews
