ថ្មីៗនេះ ចុងភៅកម្ពុជាយើង គឺ លោក សៅ សុភ័ក្ត្រ ទទួលបានពានរង្វាន់លេខ ១ ជាមួយបង្អែម «ពងក្នុងសំបុក» នៅក្នុងការតាំងពិព័រណ៍ម្ហូបអាហារអន្តរជាតិ VILLAGE INTERNATIONAL DE LA GASTRONOMIE នៅប្រទេសបារាំង។
កម្មវិធីនេះធ្វើឡើងកាលពី ថ្ងៃព្រហស្បតិ៍ ទី ១១ ដល់ ថ្ងៃអាទិត្យ ទី ១៤ ខែ កញ្ញា ម្សិលមិញនេះ។ ចំណោមប្រទេសចូលរួមតាំងពិព័រណ៍ប្រមាណ ៦២ ប្រទេស មកពីគ្រប់ទ្វីបនៅក្នុងពិភពលោក ក្នុងនោះកម្ពុជាយើង ក្នុងនាមជាប្រទេសកិត្តិយសបានរៀបចំកម្មវិធីធំដុំជាងគេ ដោយមានតាំងពីការលក់មុខម្ហូប ផលិតផលខ្មែរ កម្មវិធីធ្វើម្ហូបដោយមេចុងភៅខ្មែរ ដែលមានឈ្មោះល្បី កម្មវិធីសិល្បៈ របាំបុរាណ ជូនភ្ញៀវចម្រុះជាតិសាសន៍។
ចុងភៅ សៅ សុភ័ក្ត្រ ដែលបានធ្វើដំណើរទៅដល់ទីតាំងពិព័រណ៍ផ្ទាល់ លោកបានបង្ហាញស្នាដៃធ្វើម្ហូប និង ផ្តល់ឱ្យអន្តរជាតិបានភ្លក់រសជាតិផងដែរ។ អ្វីដែលសំខាន់ទៀតនោះ បង្អែម «ពងក្នុងសំបុក» ចម្អិនដោយដៃលោកផ្ទាល់ បានទទួលពានរង្វាន់លេខ ១ នៅក្នុងព្រឹត្តិការណ៍តាំងពិព័រណ៍នេះ ដែលនេះជាមោទកភាព ជាការទទួលស្គាល់ ក៏ដូចជាឱកាសមួយទៀត ធ្វើឱ្យអន្តរជាតិស្គាល់កម្ពុជាកាន់តែច្បាស់។
គួរឱ្យដឹងដែរថា លោក សៅ សុភ័ក្ត្រ ជាចុងភៅមានជំនាញលើម្ហូបខ្មែរច្នៃប្រឌិត ឬ ម្ហូបបែបសហសម័យ។ ជារឿយៗ លោកតែងធ្វើឱ្យកម្ពុជាល្បីល្បាញនៅលើឆាកអន្តរជាតិ ដូចជា កាលពីឆ្នាំ ២០២៤ លោកបានក្លាយជាអ្នកឈ្នះមួយរូប ក្នុងចំណោមអ្នកឈ្នះមួយចំនួនទៀត មកពីជុំវិញពិភពលោក នៅក្នុងកម្មវិធី BEST Master Chef 2024 Awards។ លើសពីនេះ លោកបានចងក្រងសៀវភៅម្ហូបកេរដំណែលស្នាដៃម្ហូបខ្មែរ The Taste of Angkor ទាំងភាគ ១ និង ភាគ ២ ហើយទទួលបានពានរង្វាន់លំដាប់អន្តរជាតិទៀតផង៕
