បើគិតមកដល់ពេលនេះ រយៈពេលត្រឹមតែ ២ ថ្ងៃប៉ុណ្ណោះ ដែលរឿង «ភូមិគ្រឹះអាគម» ផលិតឡើងដោយលោក PeyPey Dy បានដាក់បញ្ចាំងនៅតាមបណ្តារោងកុនក្នុងប្រទេសកម្ពុជា លើកលែងតែរោងកុនជារបស់ថៃប៉ុណ្ណោះ។
នាថ្ងៃដំបូងនៃការចាក់បញ្ចាំង ពោលគឺកាលពីថ្ងៃទី ២៨ ខែសីហា ឆ្នាំ ២០២៥ កន្លងទៅ រឿង «ភូមិគ្រឹះអាគម» ត្រូវបានផ្ទុះការចែករំលែកពេញបណ្តាញសង្គមពីសំណាក់អ្នកស្នេហាវិស័យកុន ដោយលើកឡើងថា សំបុត្រលក់អស់ រីឯសាច់រឿង គឺល្អមើលអាចទទួលយកបានទៀតផង។
ងាកមកកាន់តួអង្គក្នុងភាពយន្តឯណោះវិញ មហាជនច្បាស់ជាបានជ្រាបហើយ រឿង «ភូមិគ្រឹះអាគម» ក៏មានការសម្តែងជាតួឯកដោយ ម៉ែសេះ ដោយក្នុងសាច់រឿងមានឈ្មោះជា អ្នកស្រីទី ៣។ ក្នុងនោះដែរ កន្លងមក លោក PeyPey Dy ធ្លាប់បានលេចឮពាក្យពីបុគ្គលមួយចំនួនតូច ថាខ្វះតួមែនទេ បានជាជ្រើសរើស ម៉ែសេះ សម្តែងជាតួឯក។
យ៉ាងណាមិញ ក្រោយការចាក់បញ្ចាំងបាន ១ ថ្ងៃ លោក PeyPey Dy បានបង្ហោះពីមូលហេតុ និង បានដាក់ងារឱ្យ ម៉ែសេះ ថាជាតារាសម្តែងដ៏មានទេពកោសល្យ ស្វែង សុជាតា ទី ២ ខណៈ ម៉ែសេះ អាចសម្តែងបានគ្រប់ទម្រង់ មិនខុសពីរៀមច្បង ស្វែង សុជាតា។
លោក PeyPey Dy បានរៀបរាប់ថា៖ «បន្ទាប់ពីបានមើលហើយ គ្រប់គ្នាច្បាស់ជាយល់ហើយថា ហេតុអីខ្ញុំជ្រើស ម៉ែសេះ ជាតួឯក? ហើយនឹងបានឃើញយ៉ាងច្បាស់ថា មីសេះ លេងបានគ្រប់ទម្រង់ មនុស្សមានសមត្ថភាពស័ក្តិសមនឹងលើកតម្កើង។ កំឡុងពេលថត បងសីហា និយាយថា «មីសេះជាម៉ែ ស្វែងសុជាតាទី ២» និយាយបរពិត»៕
