អុកស៊ីតូស៊ីន (oxytocin) គឺជាសារធាតុអ័រម៉ូនរីករាយ ដែលជួយយើងឱ្យមានអារម្មណ៍ពោរពេញដោយក្តីស្រលាញ់ និង ទំនាក់ទំនងល្អជាមួយអ្នកដទៃ។ សារធាតុនេះត្រូវបានគេស្គាល់កន្លងមកថា ជាសារធាតុអ័រម៉ូនស្នេហា (love chemical) ដោយសារវាត្រូវបានបញ្ចេញមកនៅអំឡុងពេលនៃទំនាក់ទំនងរវាងមនុស្ស និង មនុស្ស ដូចជាការឱប និង ការថើបជាដើម។ អុកស៊ីតូស៊ីនមានតួនាទីដ៏សំខាន់នៅក្នុងដំណើរការបង្កកំណើត។ ការសិក្សាស្រាវជ្រាវជាច្រើនបានរកឃើញថា វាអាចជួយដល់ដំណើរការនៃការសម្រាលកូន (labor contractions) និង លំហូរនៃការផលិតទឹកដោះក្នុងរាងកាយស្រ្តីជាម្តាយ ព្រមទាំងចលនានៃស្ពែម៉ាតូសូអ៊ីតរបស់បុរស។
ជាការពិតណាស់ បើនិយាយអំពីអត្ថប្រយោជន៍របស់អ័រម៉ូនស្នេហា ឬអុកស៊ីតូស៊ីនមានដូចជា៖ កសាងទំនុកចិត្ត និង យល់ចិត្ត, បំផុសអារម្មណ៍សុវត្ថិភាព, ជំរុញទំនាក់ទំនងសង្គម និង អាកប្បកិរិយាគាំទ្រសង្គម, អារម្មណ៍ស្នេហាជ្រាលជ្រៅ, បង្កើនចំណង់ផ្លូវភេទ, កាត់បន្ថយស្ត្រេស និង ថប់បារម្ភ, កាត់បន្ថយការឈឺចាប់, កាត់បន្ថយហើមរលាកក្នុងរាងកាយ, ពង្រឹងប្រព័ន្ធការពារ, ជួយការកន្ត្រាក់ស្បូនអំឡុងពេលសម្រាលកូន, បង្កើនទឹកដោះបំបៅកូន, បង្កើនសម្ព័ន្ធភាពស្និទ្ធស្នាលរវាងឪពុកម្តាយ និង កូន។
ចុះតើធ្វើយ៉ាងណា ដើម្បីទទួលបានអ័រម៉ូនអុកស៊ីតូស៊ីន? ងាយៗអ្នកស្រាវជ្រាវបានរកឃើញ ដោយវាកើតចេញពីសកម្មភាពមួយចំនួនដូចជា៖ ការឱប និង ថើប មិនថាមនុស្សជាទីស្រលាញ់ មិត្តភក្តិ ឬសត្វចិញ្ចឹម, ការចំណាយពេលវេលារីករាយជាមួយមនុស្សជុំវិញខ្លួន, ការធ្វើសមាធិ, ហាត់យូហ្គា, ធ្វើសកម្មភាពល្អចំពោះអ្នកដទៃ ឬសកម្មភាពសប្បុរសធម៌, ញញឹមដាក់អ្នកដទៃ, ដើរលម្ហែ, សកម្មភាពហាត់ប្រាណ, ទទួលការម៉ាស្សា និង ស្តាប់តន្ត្រី។
មិនទាន់អស់នោះទេ រឿងសំខាន់ចម្បង ដែលធ្វើឱ្យអ័រម៉ូនអុកស៊ីតូស៊ីន ឬអ័រម៉ូនស្នេហាបញ្ចេញបានល្អបំផុត គឺការរួមភេទ។ ភាពស្និទ្ធស្នាលជាមួយដៃគូនៅអំឡុងពេលរួមភេទ នឹងធ្វើឱ្យអ្នក និង ដៃគូបញ្ចេញអ័រម៉ូនអុកស៊ីតូស៊ីនបានល្អ។ អ័រម៉ូននេះនឹងជួយបង្កើនទំនាក់ទំនងផ្លូវចិត្ត ក៏ដូចជាធ្វើឱ្យអ្នកមានអារម្មណ៍ជ្រាលជ្រៅជាមួយដៃគូ។ តែយ៉ាងណាមិញ សម្រាប់អ្នកមិនមានដៃគូ អ្នកស្រាវជ្រាវបានផ្តល់ដំណឹងល្អ ដោយគ្រាន់តែយកគូនឹងដៃខ្លួនឯង ឬនិយាយឱ្យស្រួលស្តាប់គឺសម្រេចកាមខ្លួនឯង វាក៏អាចជួយជំរុញការបញ្ចេញអ័រម៉ូនអុកស៊ីតូស៊ីនបានល្អ ដូចទៅនឹងការរួមភេទជាមួយដៃគូផងដែរ។ ជាពិសេស វាផ្តល់នូវការជំរុញអារម្មណ៍ស្រស់ស្រាយ។ អូ! បន្ថែមមួយចុងក្រោយ គឺការបង្ហាញក្តីស្រលាញ់ចំពោះមនុស្សជុំវិញខ្លួន និង ការស្រលាញ់ខ្លួនឯងឱ្យច្រើនៗ៕
ប្រភព៖ anchored in health
