បុរសអាចមានរូបរាងខាងក្រៅរឹងមាំ ប៉ុន្តែការស្រាវជ្រាវថ្មីថ្មោងបានរកឃើញគួរឱ្យភ្ញាក់ផ្អើល ដែលនៅឆ្នាំ ២០២៥ នេះ មនុស្សប្រុសហាក់លង់ស្នេហ៍មនុស្សស្រីលឿនជាងមុន ឆាប់ដាក់ចិត្តលឿនជាងមុន និង ឆាប់ស្រលាញ់ខ្លាំងលើសធម្មតាដល់ទៅពីរដង។
ជាក់ស្តែង អ្នកសិក្សាស្រាវជ្រាវនៅសាកលវិទ្យាល័យជាតិអូស្ត្រាលី (Australian National University) បានស្ទង់មតិយុវជនចំនួន ៨០៨ នាក់មកពី ៣៣ ប្រទេសផ្សេងៗគ្នា រួមទាំងសហរដ្ឋអាមេរិក ដើម្បីស្វែងយល់ពីភាពខុសគ្នារវាងភេទនៅពេលនិយាយអំពីស្នេហា។ ជាលទ្ធផល ការស្រាវជ្រាវបានបង្ហាញថា មនុស្សប្រុសជាមធ្យមបានចំណាយពេលជាង ៤ សប្តាហ៍ដាក់ចិត្តស្រលាញ់មនុស្សស្រី ខណៈមនុស្សស្រីខ្វល់ខ្វាយលើមនុស្សប្រុសយឺតជាង ឬសឹងតែមិនដាក់ចិត្តទាល់តែសោះ។
អ្នកស្រាវជ្រាវបាននិយាយនៅក្នុងឯកសាររបស់ពួកគេ ដែលបានបោះពុម្ពផ្សាយក្រោមប្រធានបទស្រាវជ្រាវ Biology of Sex Differences កាលពីចុងខែមីនាថា៖ ពិន្ទុមធ្យមនៃដំណើរការស្នេហាសម្រាប់ស្ត្រីគឺ 1.92 ខែ ក្រោយពីការបង្កើតទំនាក់ទំនងស្នេហា ចំណែកឯបុរសមានតែ 0.98 ខែ ដែលបង្ហាញថាបុរសបានស្រលាញ់មនុស្សស្រីលឿនជាងប្រមាណមួយខែឯណោះ។ ហើយជាមធ្យមបុរសដាក់ចិត្តស្រលាញ់មនុស្សស្រី ២,៦ ដង បើធៀបនឹងមនុស្សស្រីដាក់ចិត្តលើមនុស្សប្រុសមានតែ ២,៣ ដងប៉ុណ្ណោះ។
ចំពោះមូលហេតុដែលមនុស្សស្រីដាក់ចិត្តស្រលាញ់បុរសយឺត គេរកឃើញចម្លើយដោយសារចំណុចមួយចំនួនដូចជា៖ មនុស្សស្រីឥលូវមានចិត្តរឹង ឬចិត្តមិនងាយនៅក្នុងរឿងស្នេហា មានការប្តេជ្ញាខ្ពស់ និង មានការគិតគូរឱ្យប្រាកដចិត្តជាងបុរស។ ចំណែកឯបុរស ដាក់ចិត្តស្រលាញ់លឿន ដោយសារផ្តោតតែលើរូបសម្រស់ និង ការលួងលោម ជាជាងគុណភាពស្នេហា។ ដែលសំខាន់ គេថាមនុស្សប្រុសកាន់តែក្មេង ការដាក់ចិត្តស្រលាញ់កាន់តែខ្លាំងទ្វេគុណ៕
ប្រភព៖ NEW YORK POST
