ការងារសិល្បៈកំពុងមមាញឹក ឥលូវ ថេណា ថែមមុខរបរថ្មី ប្រឡូកក្នុងវិស័យជំនួញ ត្រៀមខ្លួនក្លាយជាថៅកែ

អ្នកគាំទ្រនិយមតាមដានលោក ថេណា ច្បាស់ជាបានជ្រាបហើយ ពីទេពកោសល្យសិល្បៈរបស់លោក ដែលអាចច្រៀង និពន្ធ និង សម្តែងបានល្អទៀតផង។

យ៉ាងណាមិញ បើក្រឡេកទៅមើលសកម្មភាពនៅខាងក្រៅឆាករបស់លោក ថេណា ឯនោះវិញ តារាចម្រៀងប្រុសរូបនេះ ត្រូវបានគេចាត់ទុកថា ជាតារាចម្រៀងប្រុសស្រគត់ស្រគំ ដែលមិនសូវចេះនិយាយស្តីនោះឡើយនៅខាងក្រៅ រហូតគេថាលោកជាបុគ្គល Introvert ទៀតផង ប៉ុន្តែយ៉ាងណា ម្ចាស់សាមីខ្លួនធ្លាប់ប្រាប់ថា លោក អត់ Introvert ទេ គ្រាន់តែជួបមនុស្សមិនសូវស្គាល់ លោកអៀនបន្តិចប៉ុណ្ណោះ។

ជាការពិតណាស់ បើទោះជាធ្លាប់សារភាពថា ខ្លួនពូកែអៀនក៏ពិតមែន ប៉ុន្តែបើក្រឡេកមកមើលការងាររបស់លោក ថេណា ឯណោះវិញ គេសង្កេតឃើញថាលោកពិតជាទទួលបានជោគជ័យយ៉ាងខ្លាំង ពោលគឺលោកស្ងប់ស្ងាត់ តែការងារច្បាស់លាស់ មួយដឹងមួយ។

ជាក់ស្តែង ថ្មីៗនេះ ស្របពេលការងារសិល្បៈកំពុងទទួលបានកេរ្តិ៍ឈ្មោះល្បីល្បាញទៅហើយ ស្រាប់តែគេបានឃើញ លោក ថេណា បានបង្កើតមុខជំនួញពេញនិយមមួយនាពេលបច្ចុប្បន្ន សម្រាប់ឆ្លើយតបអ្នកគាំទ្រ ដោយលោកបានបង្កើតប៊្រេនអាវរបស់ខ្លួន។ ក្នុងនោះដែរ collection ដំបូងគេនេះ លោក ថេណា បានដាក់ឈ្មោះថា «ស្ទាវខេត្ត» ដែលដូចទៅនឹងចំណងជើងបទចម្រៀងរបស់លោកទៀតផង។

គួរជម្រាបថា មុខជំនួញថ្មីរបស់លោក ថេណា ក្នុងការដាក់លក់អាវយឺតនេះ គឺទើបតែចាប់ផ្តើមប៉ុណ្ណោះ ប៉ុន្តែអ្នកគាំទ្របានសង្កេតឃើញថា នៅក្នុងផេកលក់អាវជាផ្លូវការរបស់លោក ឈ្មោះថា «Bigdoqqq Station» បាន និង កំពុងចាប់ផ្តើមទទួលបានការគាំទ្របន្តបន្ទាប់ហើយ៕