ថ្មីៗនេះ មហាជនអ្នកប្រើប្រាស់បណ្ដាញសង្គម បាននាំគ្នាផ្ទុះការជជែកវែកញែកព្រោងព្រាត ទៅលើវីដេអូដែលបានផុសលើផេកឈ្មោះ MK7 GROUP នៅថ្ងៃទី ២៥ ខែកុម្ភៈ ឆ្នាំ ២០២៥ ដោយវីដេអូនោះបង្ហាញពីសកម្មភាព Prank ទៅលើក្មេងស្រីលក់សណ្ដែកដីយ៉ាងខុសទំនង ធ្វើឱ្យនាងអាក់អន់ស្រពន់ចិត្តគួរឱ្យអាណិត ហើយប៉ះប៉ូវវិញជាមួយទឹកប្រាក់ចំនួន ១០ ម៉ឺនរៀល។
ដោយមតិមហាជនកាន់តែផ្ទុះប្រតិកម្មខ្លាំងឡើង ស្រាប់តែផេក បុរាណាចារ្យ ជាផេកដែលតែងតែចែករំលែកចំណេះដឹងល្អៗផ្នែកវប្បធម៌ បានចែករំលែកវីដេអូមួយនេះ ព្រមទាំងបញ្ចេញមតិថា លុយ ១០ ម៉ឺននេះ មិនសមតម្លៃផ្នែកសីលធម៌ និង ផ្លូវចិត្ត ហើយអាចនឹងមិនសមតម្លៃនឹងផ្នែកសេដ្ឋកិច្ចដូចគ្នា ដោយលើកពី ៣ ចំណុចដូចខាងក្រោម ៖
– ទី ១ ចំណូលនៃវីដេអូ ដែលគាត់ទទួលបានពីហ្វេសប៊ុក (ប្រសិនបើមាន)
– ទី ២ ចំណូលពីការបញ្ជាទិញផលិតផល តាមរយៈ Engagement របស់វីដេអូ
– ទី ៣ ការបញ្ចេញមុខក្នុងបណ្តាញសង្គមដោយទទួលបានកម្រៃតិច
ចំពោះការលើកឡើងនេះ ម្ចាស់ផេកដដែលបានឱ្យដឹងទៀតថា ៖ «ដូចនេះការធ្វើវីដេអូឱ្យលុយអ្វីជាដើមនោះ ក្រៅពីសីលធម៌ និង សុខភាពផ្លូវចិត្ត ត្រូវពិនិត្យមើលលើតម្លៃដែលត្រូវចាយលើតួអង្គ ថាតើសមរម្យនឹងទទួលបាន ក្នុងចំនួនប៉ុនណា»៕
