ថ្មីៗនេះ នៅឯប្រទេសចិន មហាជនមួយចំនួនមានការភ្ញាក់ផ្អើលជាខ្លាំង ក្រោយពីដឹងថាមានអ្នកទទួលទិញក្រចកដៃក្រចកជើងរបស់មនុស្ស យកទៅធ្វើថ្នាំបុរាណចិន ដើម្បីព្យាបាលជំងឺ។
រូបតំណាង
តាមព័ត៌មានបានឱ្យដឹងថា នៅប្រទេសចិនមានអាជីវកម្មប្លែក ដែលជាការដើរប្រមូលទិញក្រចករបស់មនុស្សដែលកាត់ហើយ ដើម្បីយកទៅធ្វើគ្រឿងផ្សំក្នុងរូបមន្តឱសថបុរាណចិន ដោយមានតម្លៃ ៣០០ យ័ន ឬប្រហែលជាង ៤០ ដុល្លារក្នុងទម្ងន់ ៥០០ ក្រាម។ ដោយក្នុងនោះ នៅក្នុងក្បួនឱសថបុរាណចិន ក្រចកមនុស្ស ត្រូវបានគេចាត់ទុកថាជាឱសថមួយប្រភេទហៅថា jin dui ដែលប្រើសម្រាប់ព្យាបាលចក្ខុរោគ ការពារការរលាក ឃាត់ឈាម និង បណ្តេញជាតិពុលចេញពីរាងកាយ។
យ៉ាងណាមិញ សម្រាប់ការប្រើប្រាស់វិញ គឺគេត្រូវយកទៅលាងសម្អាតសម្លាប់មេរោគ សម្ងួតឱ្យស្ងួត រួចយកទៅកិនជាម្សៅ មុននឹងយកទៅផលិតជាថ្នាំ។ ដោយឡែក នៅក្នុងសម័យបច្ចុប្បន្នការប្រើប្រាស់ថ្នាំប្រភេទនេះមានការធ្លាក់ចុះ ព្រោះតែការបារម្ភពីសុវត្ថិភាព និងអនាម័យ តែកាលពីឆ្នាំ ២០១៨ កន្លងទៅ មានថ្នាំឈឺកមួយប្រភេទ Hou Yan Wan ដែលផ្សំឡើងពីក្រចកមនុស្ស ត្រូវបានគេចុះសិទ្ធិឱ្យប្រើប្រាស់ផងដែរ៕
