នៅថ្ងៃទី ២៥ ខែកញ្ញា ឆ្នាំ ២០២៥ នេះ នាយកដ្ឋានឧតុនិយមរបស់ថៃ បានចេញសេចក្តីប្រកាសផ្តល់ដំណឹងទៅកាន់ប្រជាជន ទាក់ទងនឹងព្យុះទីហ្វុង Ragasa ដែលនឹងជះឥទ្ធិពលមកលើប្រទេសថៃនៅថ្ងៃទី ២៥ និង ២៦ ខែកញ្ញានេះ។
តាមព័ត៌មានបានឱ្យដឹងថា ខ្យល់ព្យុះមួយនេះនឹងមិនធ្វើដំណើរចូលមកវាយប្រហារប្រទេសថៃដោយផ្ទាល់នោះទេ ដោយសារតែអាចអន់កម្លាំងពីខ្យល់ត្រជាក់នៅឯប្រទេសចិន។ យ៉ាងណាក៏ដោយ ប្រទេសថៃនឹងនៅតែរងផលប៉ះពាល់យ៉ាងខ្លាំង ដោយប៉ះពាល់ដល់តំបន់ភាគខាងជើង ឦសាន កណ្តាល និង ភាគខាងកើតនៃប្រទេស បង្កឱ្យភ្លៀងធ្លាក់ខ្លាំង និង កម្រិតទឹកភ្លៀងកាន់តែកើនឡើង។
ការប៉ះពាល់ទាំងនេះ គឺអាចបង្កឱ្យមានគ្រោះថ្នាក់ផ្សេងៗ ដូចជាទឹកជំនន់ជន់លិចភ្លាមៗ ទឹកជំនន់ចេញពីព្រៃឈើ និង ទឹកហូរពីទន្លេ ជាពិសេសនៅតំបន់ដែលមានហានិភ័យដូចជា តំបន់ភ្នំ តំបន់ជិតផ្លូវទឹក តំបន់ទំនាប និង តំបន់ដែលមានទឹកជំនន់កំពុងជន់លិចហើយ៕
ប្រភព៖ Khaosod
