ករណីថ្មី! ស្រ្តីម្នាក់មុតសំបកខ្ទឹមបារាំងនៅមេដៃតែបន្តិចសោះ ស្រាប់តែឆ្លងមេរោគត្រូវបញ្ជូនទៅព្យាបាលបន្ទាន់

ថ្មីៗនេះ សារព័ត៌មានបរទេស បានរាយការណ៍ពីករណីថ្មីរបស់ស្រ្តីម្នាក់ ដែលប៊ិះនឹងអស់ជីវិត ដោយសារតែការឆ្លងមេរោគ ពីការមុតសំបកខ្ទឹមបារាំងនៅនឹងមេដៃតែបន្តិចសោះ។

តាមព័ត៌មានបានឱ្យដឹងថា នៅថ្ងៃកើតហេតុ ស្រ្តីរូបនេះបានបកខ្ទឹមបារាំង ដើម្បីរៀបចំធ្វើម្ហូប Arroz Caldo ដែលជាម្ហូបប្រចាំប្រទសហ្វីលីពីន។ ខណៈកំពុងបកនោះ ស្រាប់តែមានសំបកខ្ទឹមបារាំងតូចមួយ បានមុតចូលទៅក្នុងមេដៃរបស់នាង តែនាងក៏មិនបានចាប់អារម្មណ៍ ព្រោះគិតថាគ្រាន់តែមុតបន្តិចបន្តួច។ លុះដល់ស្អែកឡើង មេដៃរបស់នាងក៏បានឡើងហើមខុសធម្មតា ទើបនាងក៏បានប្រញាប់ទៅមន្ទីរពេទ្យ។

គ្រូពេទ្យបានរកឃើញថា នាងកំពុងតែឆ្លងមេរោគពីសំបកខ្ទឹមបារាំង ហើយគេក៏បានយកកម្ទេចសំបកនោះចេញពីមេដៃនាងផងដែរ រួចក៏បានឱ្យថ្នាំអង់ទីប៊ីយោទិច​សម្រាប់​ជំងឺរលាក​សរសៃ​វ៉ែន ​(phlebitis) និង ​រលាក​កោសិកាស្បែក (cellulitis)។ យ៉ាងណាមិញ រឿងរ៉ាវរបស់នាងត្រូវបានមហាជនចែកចាយនៅតាមបណ្តាញសង្គម ដោយម្នាក់ៗមិននឹកស្មានថាអាចនឹងមានបែបនេះកើតឡើង ជាពិសេសគឺរឿងតូចតាចក៏អាចធ្វើឱ្យគ្រោះថ្នាក់ដល់ជីវិតបាន៕

ប្រភព៖ Sanook