កម្រមាន! បុរសខ្មែរម្នាក់ សន្សំតែមប្រៃសណីយ៍ដាក់ស៊ុមត្រឹមត្រូវដូចរូបថតរៀបការ ជាពិសេស មានតែមដំបូងគេបង្អស់លើពិភពលោកទៀត

មានវ័យ ៣១ ឆ្នាំ មកពីប្រទេសកម្ពុជា លោក Fat Jase គឺជាបុរសម្នាក់ដែលមានចំណូលចិត្តខ្លាំងទៅលើការប្រមូលតែម។ សម្រាប់លោក តែមលើសពីបំណែកក្រដាស វាជាស្នាដៃដ៏ល្អឯក ដែលចាប់យកនូវប្រវត្តិសាស្ត្រ វប្បធម៌ និង ការវិវត្តនៃទំនាក់ទំនងសកល។​ តែមនីមួយៗបានចាប់យកពេលវេលា និង ទីកន្លែង ជាការតភ្ជាប់ទៅនឹងអតីតកាល ហើយវាក៏បានជំរុញចិត្ត ឱ្យលោកបន្តសន្សំតែមមកដល់សព្វថ្ងៃ។

លោក Fat Jase បានចាប់ផ្តើមសន្សំតែមនៅក្នុងឆ្នាំ ២០១២ គឺនៅពេលលោកមានអាយុ ១៨ ឆ្នាំ កំពុងធ្វើការស្ម័គ្រចិត្តនៅប្រទេសប៉ូឡូញ។ ខណៈកំពុងរុករកប្រព័ន្ធប្រៃសណីយ៍ប៉ូឡូញ លោកបានរកឃើញតែមនៅក្នុងការិយាល័យប្រៃសណីយ៍ ហើយវាពិតជាធ្វើឱ្យលោកចាប់ចិត្តនឹងសម្រស់របស់វាយ៉ាងខ្លាំង។ តែមនីមួយៗ បានប្រាប់ពីរឿងរ៉ាវប្លែកគ្នានៃព្រឹត្តិការណ៍ប្រវត្តិសាស្ត្រ វប្បធម៌ប្រពៃណី  និង មោទកភាពជាតិ។ គ្រានោះលោកបានលង់នឹងគំនិត ដែលគ្រាន់តែរបស់ដ៏តូចមួយ វាអាចធ្វើដំណើរជុំវិញពិភពលោក នាំយកសារ អារម្មណ៍​ និង ការចងចាំ។

ដោយការចង់ដឹងចង់ឃើញនេះហើយ វាបានរុញច្រានឱ្យលោកងាកមកចាប់អារម្មណ៍នឹងតែមកម្ពុជា ជាកន្លែងដែកអាចរុករកការដឹងគុណយ៉ាងជ្រាលជ្រៅចំពោះប្រវត្តិសាស្ត្រ និង វប្បធម៌ដ៏មានសារសំខាន់។ គ្រប់តែមទាំងអស់សុទ្ធតែតំណាងឱ្យជំពូករឿងរ៉ាវនៅក្នុងប្រទេសកម្ពុជា មិនថាជាការរម្លឹកព្រឹត្តិការណ៍ប្រវត្តិសាស្ត្រសំខាន់ៗ បង្ហាញពីបេតិកភណ្ឌសិល្បៈ  ឬឆ្លុះបញ្ចាំងពីការវិវត្តនៃទំនាក់ទំនង។ លោកបានលើកឡើងថា៖ «តាមរយៈតែម ខ្ញុំបានឃើញពីរបៀប ដែលប្រវត្តិសាស្ត្រប្រៃសណីយ៍កម្ពុជា ឆ្លុះបញ្ចាំងអំពីការងើបឡើងវិញ, ប្រពៃណី និង វឌ្ឍនភាពរបស់ប្រទេស។»​

ជាការពិត ការចាប់ផ្តើមដ៏សាមញ្ញនេះ បានក្លាយជាទៅជាចំណង់ចំណូលចិត្តពេញមួយជីវិតរបស់ លោក Fat Jase ។ ឥលូវនេះ ការប្រមូលតែមរបស់លោក បានលាតសន្ធឹងជុំវិញពិភពលោក រាប់ចាប់តាំងពីតែម Penny Black ដែលជាតែមបុរាណដំបូងគេបង្អស់លើពិភពលោក រហូតដល់តែមសម័យទំនើប ដែលមកពីវប្បធម៌ចម្រុះ។ ​

លោកបានចាប់ចិត្តបំផុតជាមួយតែម ដែលមានសិល្បៈ និង តម្លៃជាប្រវត្តិសាស្ត្រ ជាពិសេស តែមទាក់ទងនឹងប្រវត្តិសាស្ត្រខ្មែរ។ លោកថា តែមគឺលើសពីការប្រមូល ពួកវាគឺជាអ្នកប្រាប់នូវរឿងរ៉ាវ រក្សាជ័យជម្នះ ការតស៊ូ និង សេចក្តីប្រាថ្នានៃជាតិ។

ប៉ុន្មានឆ្នាំមកនេះ លោក Fat Jase ប្រមូលតែមប្រៃសណីយ៍បានប្រមាណ ៥ ម៉ឺនតែម។ ហើយឆាប់ៗនេះ នៅថ្ងៃទី 0៣ ខែ មេសា ឆ្នាំ ២០២៥ លោកនឹងសម្ពោធពិព័រណ៍តែមរបស់លោកមួយ ក្រោមប្រធានបទ «POSTAGE STAMPS, FEATURING CAMBODIA – PART 2» ឬ «តែមប្រៃសណីយ៍ និង តែមប្រៃសណីយ៍កម្ពុជា – វគ្គ ២» ដែលរៀបចំឡើងនៅស្ទូឌីយ៉ូ STOR-Y Cambodia ស្ថិតនៅផ្លូវ B19 & 20 រាជធានីភ្នំពេញ។​ បន្ទាប់មក ចាប់ពីថ្ងៃទី ០៤ ខែមេសា ដល់ ថ្ងៃទី ៣១ ខែ ឧសភា ឆ្នាំ ២០២៥ លោកអ្នកអាចចូលទស្សនាដោយសេរី។

គួរឱ្យដឹងដែរថា ពិព័រណ៍តែមលើកនេះ លោក Fat Jase នឹងនាំមកជូន តែម ៣ សម័យកាលគឺ តែមឆ្នាំ ១៨៤០ ជាតែមដំបូងបង្អស់នៅលើពិភពលោក, តែមសម័យអាណានិគមបារាំងឆ្នាំ ១៨៦៣-១៩៥៣, និង តែសម័យឯករាជ្យពីឆ្នាំ ១៩៥៣-បច្ចុប្បន្ន។ ដូច្នេះ កុំភ្លេចចូលរួមទស្សនាទាំងអស់គ្នាណា!៕