SKOOLER JAMSTER គឺជាម៉ាកសម្លៀកបំពាក់ដ៏មានប្រជាប្រិយភាពនៅក្នុងស្រទាប់យុវវ័យ ជាពិសេស ស្ទីលរបស់វាកំពុងត្រូវចិត្តបំផុតពីសំណាក់តារាចម្រៀងរ៉េប។ យោងតាមគេហទំព័រ ReMade in Cambodia ម៉ាក SKOOLER JAMSTER ត្រូវបានបង្កើតឡើងនៅទីក្រុងភ្នំពេញក្នុងឆ្នាំ ២០២០ ដោយយុវជនវ័យក្មេងមួយរូប ដែលគេស្គាល់ឈ្មោះថា KWANX ដែលជាម្ចាស់ និង ជាអ្នកច្នៃម៉ូដនៃម៉ាកសម្លៀកបំពាក់នេះ។
ស្ថាបនិក KWANX បានបញ្ចប់ការសិក្សាពីមហាវិទ្យាល័យច្នៃម៉ូដ Fashion Institute of Design & Merchandising ឬហៅកាត់ថា FIDM នៅទីក្រុងឡូសអេនជឺលេស រដ្ឋកាលីហ្វ័រញ៉ា សហរដ្ឋអាមេរិក។
ម៉ាកសម្លៀកបំពាក់របស់លោកផ្តោតការបំផុសគំនិត (inspiration) ពីការរួមបញ្ចូលគ្នានៃស្ទាយ៌ Gothic និង Punk ដោយប្រើពណ៌ខ្មៅជាចម្បង ខណៈពេលខ្លះរួមបញ្ចូលជាមួយពណ៌ផ្សេងទៀត។
ទស្សនរបស់ម៉ាកសម្លៀកបំពាក់ SKOOLER JAMSTER ៖ «យើងមិនជឿថាហ្វេហ្សិន Gothic និង Punk វាសង្កត់ធ្ងន់ហួសហេតុ ដូចដែលវាធ្វើឱ្យមានឥទ្ធិពលតាំងពីកកើតដំបូង។ យើងចូលចិត្តបង្កើតការឌីហ្សាញដោយឡែក និង ខុសប្លែក ដែលមិនធ្លាប់ឃើញពីមុន។ ឆន្ទៈ និង សមត្ថភាពរបស់យើង គឺមើលឃើញភាពស្រស់ស្អាតនៅកន្លែងដែលអ្នកដទៃមិនអាចឃើញ។ នេះហើយជាអ្វី ដែលកំណត់ឱ្យយើងមើលមកខុសដាច់ពីគេ»៕
