ជាការពិតណាស់ កន្លងមកមហាជននិយមតាមដានទាំងជីវិតការងារ និង ឯកជនរបស់តារាចម្រៀង Original Song កញ្ញា ចិត្ត កញ្ចនា នៅលើបណ្តាញសង្គមនានា ច្បាស់ជាបានជ្រាបហើយថា កន្លងមកកញ្ញាធ្លាប់តែបង្ហាញនូវការលើកទឹកចិត្ត ផ្នត់គំនិតល្អៗសម្រាប់អ្នកគាំទ្រទាំងលើវិស័យតន្ត្រី និង ការរស់នៅប្រចាំថ្ងៃ។ យ៉ាងណាមិញ ថ្មីៗនេះ កញ្ញា ចិត្ត កញ្ចនា បានបង្ហោះសំណេរមួយ បង្ហាញអារម្មណ៍របស់ខ្លួនទំនងជាប្រតិកម្មនឹងបុគ្គលណាម្នាក់ ដែលតែងតែនិយាយបំភ្លើសពីរូបនាង ច្រើនលើកច្រើនសា។
ក្នុងនោះដែរ កញ្ញា ចិត្ត កញ្ចនា បានរៀបរាប់ថា៖ «មនុស្សប្រភេទខ្ញុំ ឱ្យតម្លៃគេណាស់, ជួយតិច ឬច្រើន ខ្ញុំតែងតែតបស្នងត្រឡប់វិញ ហើយភាគច្រើន គឺខ្ញុំឱ្យលើសពីអ្វីដែលគេសុំ ឬទាមទារ។ ប៉ុន្តែមានមនុស្សមួយចំនួនតូច ចូលចិត្តសម្តែងធ្វើកម្សត់ ធ្វើជនរងគ្រោះ ទាំងដែលខ្លួនឯងមាត់អត់គម្រប និយាយក្រឡិចក្រឡុច បំភ្លើសការពិត យកត្រូវម្នាក់ឯង បែបគិតថាខ្ញុំភ្លើ! ដើរនិយាយធ្វើតួកម្សត់ ទាំងដែលភស្តុតាងខ្ញុំមានទាំងអស់! នែ! ធ្វើអី និយាយអី ខ្ញុំដឹងទាំងអស់! ខ្ញុំមិនតបតចាត់ទុកថា ទុកមុខឱ្យណា! តែកុំភ្លើ បិទផ្លូវខ្លួនឯង! គ្រាន់ចង់ប្រាប់ប៉ុណ្ណឹង ហើយផុសមួយនេះ បើមានខ្លួន សាងបាបអីខ្លះដាក់ខ្ញុំរើសយកទៅ! ផុសឱ្យក្មេងដឹងកុំព្រហើនខុសរឿង។ កុំមនុស្សល្អតែឯងពេក អត់ចេះខុស អញហត់ណាស់!»។
បើទោះជាមិនបានបង្ហាញពីបុគ្គលណាម្នាក់ក៏ពិតមែន ប៉ុន្តែមហាជន អ្នកគាំទ្រមានការសង្ស័យ ថាអាចជាអ្នកសិល្បៈដូចគ្នា។ ម្យ៉ាងវិញទៀត ក៏មានអ្នកចូលទៅបញ្ចេញមតិលើកទឹកចិត្ត ដល់កញ្ញា ចិត្ត កញ្ចនា ផងដែរ ថាកុំឱ្យគិតច្រើនពីបុគ្គលបែបនេះ៕
