កម្រណាស់! សុខៗ វណ្ណដា បញ្ចេញមតិលើបទចូលឆ្នាំថ្មីរបស់ ម៉ម ពេជ្ជរិទ្ធ ធ្វើឱ្យអ្នកគាំទ្រលួចសង្ឃឹមរឿងមួយ

ដូចមហាជនបានជ្រាបមកហើយ ស្របពេលឱកាសបុណ្យចូលឆ្នាំថ្មីប្រពៃណីខ្មែរ កាន់តែខិតជិតមកដល់នោះ គេបានឃើញតារាចម្រៀងប្រុសស្រីល្បីៗជាច្រើន បានបញ្ចេញចម្រៀងបែបប្រពៃណី សម័យ និង ញាក់កន្ត្រាក់អារម្មណ៍ដូចគ្នា ដើម្បីអបអរឱកាសដ៏ពិសេសនេះ។

ក្រឡេកទៅកាន់តារាចម្រៀងវ័យក្មេងសំឡេងផ្អែម លោក ម៉ម ពេជ្ជរិទ្ធ ឯណោះវិញ ក៏មិនខុសពីសិល្បករដទៃទៀតនោះឡើយ នៅក្នុងឱកាសចូលឆ្នាំប្រពៃណីខ្មែរឆ្នាំនេះ លោកក៏បានបញ្ចេញបទចម្រៀងដូចឆ្នាំមុនៗដែរ និង កំពុងទទួលបានការគាំទ្រយ៉ាងខ្លាំងពីសំណាក់មហាជន។

ជាក់ស្តែង ក្នុងឱកាសចូលឆ្នាំនេះ លោកបានបញ្ចេញបទចម្រៀង ២ បទ ហើយ ដោយបទទី ១ លោក​ ម៉ម ពេជ្ជរិទ្ធ បកស្រាយរួមគ្នានឹង ព្រះនាងតូច នរោមត្តម ចេនណា គឺបទ «ព្រះនាងរាំវង់» និង បទទី ២ គឺជាចម្រៀងទោលមានចំណងជើងថា «No NO!! (អស់ស្រែកេរយាយ)»។

យ៉ាងណាមិញ បទចម្រៀងទោលក្នុងឱកាសចូលឆ្នាំខ្មែររបស់លោក ម៉ម ពេជ្ជរិទ្ធ ក៏ត្រូវបានកំពូលតារាចម្រៀងរ៉េប វណ្ណដា បង្ហាញការពេញចិត្ត និង លើកឡើងថា ជាបទចម្រៀងចូលឆ្នាំខ្មែរ ដែល វណ្ណដា ពេញចិត្តទៀតផងក្នុងឆ្នាំនេះ។

ភ្លាមនោះដែរ គ្រាន់តែឃើញ តារាចម្រៀងរ៉េប វណ្ណដា បានចែករំលែកការពេញចិត្តបទចម្រៀងរបស់ខ្លួន លោក ម៉ម ពេជ្ជរិទ្ធ ក៏បានចូលទៅបញ្ចេញមតិឆ្លងឆ្លើយគ្នានឹងលោក វណ្ណដា ក្នុងខមមិន រហូតអ្នកគាំទ្រឃើញហើយ រំអុកចង់ឱ្យតារាចម្រៀងសំឡេងផ្អែម និង តារាចម្រៀងរ៉េបរូបនេះ ចេញចម្រៀងរួមគ្នាទៀតផង៕