នៅព្រឹកវេលាម៉ោង ៧៖០០ នាទី ថ្ងៃទី ០១ ខែសីហា ឆ្នាំ ២០២៥ នេះ អ្នកនាំពាក្យរាជរដ្ឋាភិបាល បានសង្ខេបព័ត៌មានអំពីលទ្ធផលនៃការអនុវត្តបទឈប់បាញ់កម្ពុជា-ថៃ នៅទីស្តីការគណៈរដ្ឋមន្ត្រី។
តាមរយៈសេចក្ដីសង្ខេបព័ត៌មាន លោកជំទាវឧត្តមសេនីយ៍ឯក ម៉ាលី សុជាតា អនុរដ្ឋលេខាធិការ និងជាអ្នកនាំពាក្យក្រសួងការពារជាតិ បានឱ្យដឹងថា រាជរដ្ឋាភិបាលកម្ពុជា បានស្នើសុំការអន្ដរាគមន៍ពីប្រទេសម៉ាឡេស៊ី ដែលជាប្រធានប្ដូរវេនរបស់អាស៊ាន ដើម្បីជួយអន្ដរាគមន៍ធ្វើយ៉ាងណាឱ្យភាគីថៃ ប្រគល់ទាហានកម្ពុជាចំនួន ២០ រូប ដែលគេចាប់ខ្លួនទៅមកប្រទេសកម្ពុជាវិញកាន់តែឆាប់ និង ប្រកបដោយសុវត្ថិភាព។
អ្នកនាំពាក្យក្រសួងការពារជាតិកម្ពុជា បានបញ្ជាក់យ៉ាងដូច្នេះថា «រាជរដ្ឋាភិបាលកម្ពុជា កំពុងបន្ដធ្វើចរចាហើយក៏កំពុងជំរុញឱ្យភាគីថៃ ប្រគល់កងកម្លាំងរបស់យើងឱ្យយើងវិញឱ្យបានឆាប់រហ័ស ស្របតាមច្បាប់មនុស្សធម៌អន្ដរជាតិ។ កម្ពុជាក៏បានស្នើឱ្យម៉ាឡេស៊ី ដែលជាប្រធានអាស៊ានឱ្យជួយអន្ដរាគមន៍ដើម្បីជំរុញឱ្យភាគីថៃ ឆាប់ប្រគល់ពួកគេឱ្យយើងវិញ»។ លោកស្រី បានអះអាងទៀតថា ក្រសួងការពារជាតិ កងយោធពលខេមរភូមិន្ទ មិនទុកសមាជិករបស់ខ្លួនណាម្នាក់ចោលនោះទេ ទោះក្នុងកាលៈទេសៈណាក៏ដោយ៕
