នៅថ្ងៃទី ២៨ ខែសីហា ឆ្នាំ ២០២៥ សារព័ត៌មានថៃ Khaosod បានបញ្ជាក់ថា គ្រូបង្រៀនម្នាក់នៅខេត្ត Surin នៃប្រទេសថៃ បានអះអាងថា មានការចាប់ខ្លួនកូនសិស្សអាយុ ១៣ ឆ្នាំម្នាក់ ក្រោមការចោទប្រកាន់ថា ក្មេងម្នាក់នោះគឺជាជនអន្តោប្រវេសន៍ខុសច្បាប់ ដែលកូនសិស្សរូបនោះ មានម្តាយជាជនជាតិខ្មែរ និង ឪពុកចុងជាជនជាតិថៃ ត្រូវបានប៉ូលិសឃាត់ខ្លួន នៅឯសាលារៀនកាលពីថ្ងៃពុធ ដើម្បីគ្រោងបណ្តេញចេញពីប្រទេស។
ក្រោយទទួលបានដំណឹងនេះ ឧកញ៉ា ប៉ិច បូឡែន អគ្គនាយកក្រុមហ៊ុន វេសឡាញ អេឌ្យូខេសិន គ្រុប និង ជាទីប្រឹក្សាក្រសួងការងារ និង បណ្តុះបណ្តាលវិជ្ជាជីវៈ បានប្រកាសផ្តល់ជូនអាហារូបករណ៍ជូនដល់យុវសិស្សដែលមានម្ដាយជាជនជាតិខ្មែរ និង ឪពុកជាជនជាតិថៃ ដែលត្រូវប៉ូលិសថៃបណ្ដាញចេញពីសាលាកាលពីប៉ុន្មានថ្ងៃមុននេះ។ នេះបើតាមការឱ្យដឹងពីសារព័ត៌មានក្នុងស្រុក នៅថ្ងៃទី ២៩ ខែសីហា ឆ្នាំ ២០២៥ នេះ។
តាមប្រភពបានបន្តឱ្យដឹងថា បន្ថែមពីនេះ លោកឧកញ៉ា ក៏បានសន្យាផ្តល់ជូនឱកាសការងារជូនដល់ស្រ្តីជាម្ដាយ និង បុរសជាឪពុកជនជាតិថៃផងដែរ ដោយមិនរើសអើងជាតិសាសន៍ប្រសិនបើពួកគាត់សម្រេចចិត្តចូលមករស់នៅក្នុងប្រទេសកម្ពុជាវិញ៕
