ថ្មីៗនេះ កញ្ញា ពេជ្រ ចរណៃ ដែលមហាជនស្គាល់ថាជា តារាសម្តែង និង គ្រូគុនល្បុក្កតោ បានធ្វើការសម្ពោធអាជីវកម្មថ្មីរបស់ខ្លួន ដែលជាហាងអាហារដ្ឋានម្ហូបខ្មែរ ភ្ជាប់មកជាមួយការបង្ហាត់ក្បាច់គុន និង របាំបុរាណខ្មែរ។
ពិតមែនទៅ អាជីវកម្មនេះបានត្រៀមបើកសម្ពោធកាលពីខែមិថុនា កន្លងទៅ តែជាអកុសល មុនថ្ងៃសម្ពោធក៏ជួបឧបទ្ទវហេតុ ឆ្លងប្រព័ន្ធអគ្គិសនីក្នុងហាង កើតជាអគ្គិភ័យឆាបឆេះគ្មានសល់។
តាមរយៈបទសម្ភាសជាមួយ «ប្រជាប្រិយ» នាងបាននិយាយថា នេះជាហេតុការណ៍ ដែលមិនអាចបំភ្លេចបាន អស់ទាំងទ្រព្យសម្បតិ្តខ្លួនឯងផង និង ម្ចាស់ផ្ទះផង ហើយវាក៏ជាឧបសគ្គលើកទី ៤ ហើយ សម្រាប់នាងនៅក្នុងការបើករកស៊ី។
ពេជ្រ ចរណៃ បានឱ្យដឹងទៀតថា ថ្វីត្បិតនាងហាត់រៀនក្បាច់គុន និង របាំខ្មែរ ប៉ុន្តែទាក់ទងនឹងជំនឿ នាងមិនដែលជឿនោះទេ។ តែក្រោយហេតុការណ៍កើតឡើង នាងបានរកអ្នកចេះមើលក្បួនជ័យភូមិខ្មែរ មើលភូមិសាស្ត្រទឹកដីកន្លែងកើតហេតុ ទើបឃើញថា ថ្ងៃដែលនាងបើកហាង គឺចំថ្ងៃធាតុភ្លើង ហើយការបើកអាហារដ្ឋាន គឺជាកន្លែងប្រើភ្លើងទៀត ដែលវាហាក់មិនល្អ ឋិតនៅលើលេខអគ្គិភ័យ។ ដូច្នេះ សម្រាប់ការរៀបចំបើកសម្ពោធជាថ្មីនេះ នាងបានជ្រើសរើសថ្ងៃល្អ គឺនៅថ្ងៃទី ១ ខែ តុលា ឆ្នាំ ២០២៥ កន្លងទៅ។
នាងថា ចូលដល់វ័យជិត ៣០ ឆ្នាំ នាងជួបបញ្ហាផ្ទួនៗ តែយ៉ាងណា នាងចាត់ទុកវាជាមេរៀនសម្រាប់ខ្លួនឯង កាលណាឆ្លងកាត់ឧបសគ្គធំៗ វាធ្វើឱ្យនាងកាន់តែរឹងមាំ៕
