កាលពីឆ្នាំ ២០១៩ ក្នុងវ័យ ១៩ ឆ្នាំ យុវជន លឹម រាជ្ជត្តា ត្រូវបានមហាជនផ្ទុះការចាប់អារម្មណ៍ម្តងរួចមកហើយ ដែលគេស្គាល់ថាជា អាកាសយានិកកម្ពុជាវ័យក្មេង ដែលមានសមត្ថភាពខ្ពស់ក្នុងការបើកយន្តហោះ Airbus A320 ជាប្រភេទយន្តហោះអាចផ្ទុកអ្នកដំណើររហូតដល់ជិត ២០០ នាក់។
កន្លងទៅតែប៉ុន្មានឆ្នាំ ឥលូវនេះ អាកាសយានិក លឹម រាជ្ជត្តា មានវ័យប្រហែល ២៥ ឆ្នាំ រូបរាងកាន់តែសង្ហា និង មានបទពិសោធបម្រើការងារនៅក្នុងក្រុមហ៊ុនអាកាសចរណ៍ជាបន្តបន្ទាប់ ជាពិសេសចុងក្រោយនេះ លោកបានផ្លាស់ប្តូរទៅក្រុមហ៊ុនអាកាសចរណ៍ដ៏ល្បីមួយផងដែរ។
រំឭកអំពីប្រវត្តិការសិក្សា លោកបានបញ្ចប់បរិញ្ញាបត្រផ្នែក គ្រប់គ្រងទេសចរណ៍ និង បដិសណ្ឋារកិច្ច នៅសាកលវិទ្យាល័យជាតិគ្រប់គ្រង រាជធានីភ្នំពេញ។ ចំពោះចំណេះដឹងផ្នែកហោះហើរវិញ លោកបានបញ្ចប់ការសិក្សាជំនាញបើកបរយន្តហោះ នៅសាលាអាកាសចរណ៍ Epic Flight Academy នៅរដ្ឋផ្លរីដា សហរដ្ឋអាមេរិក។
នៅខែមករា ឆ្នាំ ២០២០ ដល់ខែ មីនា ឆ្នាំ ២០២៥ លោកបានចូលបម្រើការងារក្នុងតំណែងជាមន្ត្រី First Officer នៅក្រុមហ៊ុនអាកាសចរណ៍ Cambodia Angkor Air។ ហើយចាប់ពីខែ មីនា មក លោកទើបបានផ្លាស់ប្តូរទៅបម្រើការងារនៅក្រុមហ៊ុនអាកាសចរណ៍ដ៏ល្បី AirAsia Cambodia។
ដើមឆ្នាំ ២០២៥ នេះផងដែរ លោកក៏ទទួលបានអាជ្ញាប័ណ្ណហោះហើរ Airline Transportation Pilot License ពី BAA Training Vietnam ដែលជាសាខានៃមជ្ឈមណ្ឌលបណ្តុះបណ្តាលអាកាសចរណ៍ឯករាជ្យឈានមុខគេ ដែលមានវត្តមាននៅទូទាំងពិភពលោក៕
ប្រភព៖ LI
