នៅថ្ងៃទី ១៣ ខែតុលា ឆ្នាំ ២០២៥ នេះ មានករណីរន្ទះបាញ់ចំទៅលើរោងចក្រមួយនៅកន្លែងនៅក្នុងប្រទេសថៃ ដែលបង្កឱ្យទៅជាអគ្គិភ័យ និងបាក់រលំឃ្លាំងយ៉ាងមិនគួរឱ្យជឿ។
រោងចក្រខាងលើនេះជារោងចក្រផលិតប្រអប់ស្នោរ ស្ថិតនៅក្នុងឃុំបាងព្រះ ស្រុកស្រីរាឆា ខេត្តឈុនបុរី។ តាមព័ត៌មានបានឱ្យដឹងថា ហេតុការណ៍នេះបានកើតឡើងនៅម៉ោងប្រមាណជាង ១ ថ្ងៃត្រង់ ដោយនៅសុខៗ ស្រាប់តែមានរន្ទះបាញ់មកចំឃ្លាំង រួចក៏កើតទៅអណ្តាតភ្លើងឆាបឆេះ ហើយកម្មករនាំគ្នាជួយពន្លត់ តែពន្លត់មិនទាន់ ក៏បណ្តាលឱ្យមានការរាលដាលទៅកាន់ឃ្លាំងជាប់ៗនោះចំនួន ២ ឃ្លាំងទៀត។
យ៉ាងណាមិញ ខាងអាជ្ញាធរបានចុះទៅអន្តរាគមន៍ជួយពន្លត់ដោយប្រើឡានបាញ់ទឹកអស់ ២០ ឡាន និងប្រើប្រាស់ពេលប្រមាណជាង ២ ម៉ោង ក៏នៅតែមិនទាន់អាចគ្រប់គ្រងស្ថានការណ៍បានទាំងស្រុងនៅឡើយ។ ដោយឡែក ការរាយការណ៍ពីអ្នករបួស ឬតម្លៃនៃការខូចខាតរបស់រោងចក្រក៏នៅមិនទាន់មានការបង្ហាញដូចគ្នា៕
ប្រភព៖ Khaosod
