កាលពីប៉ុន្មានថ្ងៃមុននេះ អ្នកលេងបណ្តាញសង្គមហ្វេសប៊ុក និង អ្នកគាំទ្រតារាចម្រៀង លោក មង្គល ទីណា ច្បាស់ជាបានជ្រាបហើយ ពីការរៀបចំស្បៀងអាហារជូនដល់កងកម្លាំងឈរជើងនៅខ្សែបន្ទាត់ព្រំដែន នាខេត្តកោះកុង។
ក្នុងនោះដែរ លោក មង្គល ទីណា និង ភរិយា បានរៀបចំមូលនិធិ ដោយទទួលបានការចូលរួមពីសំណាក់មហាជន បងប្អូន អ្នកគាំទ្រ ជាពិសេសនោះ គឺអាជីវករនៅក្នុងផ្សារដងទង់ នាខេត្តកោះកុងតែម្តង។
ជាការពិត ខ្សែបន្ទាត់ព្រំដែន នាខេត្តកោះកុង បើទោះជាមិនមានស្ថានការណ៍ក្តៅដូចខេត្តខាងតំបន់ព្រះវិហារ និង ឧត្តរមានជ័យក្តី ប៉ុន្តែកងកម្លាំងប្រចាំខេត្តកោះកុង បានប្រចាំការការពារព្រំដែន និង ប្រជាពលរដ្ឋទាំងយប់ទាំងថ្ងៃ។ ម្យ៉ាងវិញទៀតនោះ ក៏មានជនភៀសសឹកបានជម្លៀសទៅកាន់វត្តអារ៉ាមនៅតាមភូមិស្រុកមួយចំនួនដែរ។
ជាក់ស្តែង ក្រោយពីទទួលបានថវិកាចូលរួមពីសប្បុរសធម៌ និង រួមបញ្ជូលថវិកាផ្ទាល់ខ្លួនហើយ កាលពីថ្ងៃទី ១៧ ខែសីហា ឆ្នាំ ២០២៥ កន្លងទៅ លោក មង្គល ទីណា បានយកស្បៀងទៅជូនដល់កងកម្លាំងចំនួន ១៧ ក្រុម រួចរាល់ហើយដែរ ហើយនៅថ្ងៃទី ១៩ ខែសីហា ឆ្នាំ ២០២៥ នេះ លោក មង្គល ទីណា បានឱ្យដឹងថា លោក និង ក្រុមគ្រួសារ នឹងបន្តរៀបចំស្បៀងជូនដល់កងកម្លាំងនៅតំបន់ឆ្ងាយៗបន្ថែមទៀត ខណៈកងកម្លាំងជួរមុខតាមតំបន់មួយចំនួននាខេត្តកោះកុងបានជម្រាបដំណឹងថា ពួកគាត់ខ្វះខាត និង មិនទាន់មានអ្នកទៅដល់។
លោក មង្គល ទីណា បានឱ្យដឹងថា៖ «កាលពីអាទិត្យមុន ខ្ញុំ និង ក្រុមគ្រួសារ បានរៀបចំស្បៀងអាហារ ដោយបានពីការប្រមូលថវិកាពីបងប្អូន និង ថវិកាដោយផ្ទាល់ជូនបងៗកងកម្លាំងតាមព្រំដែនគោលដៅខេត្តកោះកុងប្រមាណ ១៧ ក្រុមរួចហើយ ប៉ុន្តែនៅមានបងៗកងកម្លាំងនៅតាមតំបន់មួយចំនួន ជាក់ស្តែងបងៗកងទ័ពជួរមុខខាង ៣៣៧ ដែលពួកយើងមិនទាន់ទៅដល់ និង មិនទាន់ទទួលបាន ដូច្នេះខ្ញុំបាទ និង ក្រុមគ្រួសារ នឹងបន្តរៀបចំស្បៀងជាបន្តទៀត ដើម្បីជូនដល់បងៗ»៕
