ហេតុការណ៍រង្គើដោយកន្លែងនៅភ្នំពេញ និង ព្រះសីហនុ មន្ត្រីជំនាញកម្ពុជាកំពុងប្រមូលព័ត៌មាន សង្ស័យរងឥទ្ធិពលពីការរញ្ជួយដីនៅមីយ៉ាន់ម៉ា និង ថៃ

នៅរសៀលថ្ងៃទី ២៨ ខែមីនា ឆ្នាំ ២០២៥ នេះ តាមរយៈគណៈកម្មាធិការជាតិគ្រប់គ្រងគ្រោះមហន្ដរាយ បានបញ្ជាក់ឱ្យបានដឹងថា មកទល់ពេលនេះ គណៈកម្មាធិការជាតិកំពុងប្រមូលព័ត៌មានហេតុការណ៍រង្គើដោយកន្លែងនៅក្នុងប្រទេសកម្ពុជា ដោយសង្ស័យជះឥទ្ធិពលមកពីការរញ្ជួយដីកម្រិតធ្ងន់រហូតដល់ ៧.៧ រ៉ិចទ័រ នៅទីក្រុងបាងកក ប្រទេសថៃ និង ប្រទេសមីយ៉ាន់ម៉ា។

ក្នុងនោះ ឯកឧត្តម គន់ គីម ទេសរដ្ឋមន្ដ្រីទទួលបន្ទុកបេសកកម្មពិសេស និង ជាប្រធានគណៈកម្មាធិការជាតិគ្រប់គ្រងគ្រោះមហន្ដរាយ បានថ្លែងប្រាប់បណ្ដាញព័ត៌មានក្នុងស្រុក Fresh News ឱ្យបានដឹងថា នៅពេលនេះមន្ដ្រីជំនាញកំពុងធ្វើការប្រមូលព័ត៌មានបន្ថែមទៀត ដើម្បីធ្វើការវាយតម្លៃ និង សន្និដ្ឋានជំហានដំបូងជុំវិញហេតុការណ៍រង្គើនេះ ដោយសង្ស័យអាចជាការជះឥទ្ធិពលមកពីហេតុការណ៍រញ្ជួយដីកម្រិតធ្ងន់នៅប្រទេសជិតខាង។ យ៉ាងណាក៏ដោយ លោកទេសរដ្ឋមន្រ្តី គន់ គីម នឹងបញ្ជាក់ពីហេតុការណ៍ ក្រោយទទួលបាន និង មានការវាយតម្លៃនៃការរញ្ជួយនេះ។

គួរឱ្យដឹងផងដែរថា នៅរសៀលថ្ងៃទី ២៨ ខែមីនា ឆ្នាំ ២០២៥ នេះ មានហេតុការណ៍គ្រោះរញ្ជួយដីកម្រិតធ្ងន់រហូតដល់ ៧.៧ រ៉ិចទ័រ បានវាយប្រហារចំតំបន់ភាគកណ្តាលនៃប្រទេសមីយ៉ាន់ម៉ា ខណៈកម្លាំងញ័ររញ្ជួយដ៏ខ្លាំងក្លា ក៏បានជះឥទ្ធិពលដល់ប្រទេសថៃ និង វៀតណាមផងដែរ៕

ប្រភព ៖ Fresh News