កាលពីថ្ងៃទី ៦ ខែសីហា ឆ្នាំ ២០២៥ កន្លងទៅនេះ លោក Somsak Thepsuthin រដ្ឋមន្ត្រីក្រសួងសុខាភិបាលរបស់ថៃ បានឱ្យដឹងថាខ្លួនត្រៀមនឹងប្តឹងកម្ពុជា ក្នុងករណីដែលកម្ពុជាបានធ្វើឱ្យខូចខាតមន្ទីរពេទ្យជាង ២០ កន្លែងក្នុងប្រទេសរបស់ខ្លួន ជុំវិញបញ្ហាប៉ះទង្គិចនៅព្រំដែន។
លោក Somsak Thepsuthin បានឱ្យដឹងថា ការប៉ះទង្គិចរវាងកម្ពុជា និងថៃ បានធ្វើឱ្យមន្ទីរពេទ្យនៅក្នុងប្រទេសប៉ះពាល់ខូចខាតរហូតដល់ ២០ កន្លែង ដោយកន្លែងខ្លះក៏ខូចខាតស្ទើរទាំងអស់ កន្លែងខ្លះក៏ខូចខាតមួយផ្នែក។ ក្នុងនោះការខូចខាតជារួមគិតជាទឹកប្រាក់សរុបជាង ១៤៦ លានបាត ដោយមិនរាប់បញ្ចូលថ្លៃសម្ភារៈពេទ្យមួយចំនួន ដូចជាម៉ាស៊ីនថតកាំរស្មីអ៊ិចជាដើម។ លោក Somsak Thepsuthin នឹងធ្វើការប្តឹងមកកាន់កម្ពុជា ក្នុងករណីដែលបានធ្វើឱ្យប៉ះពាល់ដល់មន្ទីរពេទ្យទាំងនេះ។
ដោយឡែក លោក Somsak Thepsuthin បានឱ្យដឹងទៀតថា ក្រុមការងារ MCATT បានចុះទៅពិនិត្យសុខភាពផ្លូវចិត្តរបស់អ្នកស្រុកអ្នកភូមិនៅតំបន់ជាយដែនចំនួន ៨០ ០០០ នាក់ ជុំវិញបញ្ហាប៉ះទង្គិចរវាងកម្ពុជា និង ថៃ ហើយក្នុងនោះរកឃើញថា ៤ ៤៥២ នាក់មានការតានតឹងអារម្មណ៍ខ្លាំង ហើយ ៤៩២ នាក់ មានហានិភ័យដែលអាចនឹងធ្វើអត្តឃាត៕
ប្រភព៖ CH7
