កាលពីថ្ងៃទី ២១ ខែមិថុនា ឆ្នាំ ២០២៥ កន្លងទៅនេះ នៅប្រទេសប្រេស៊ីលមានឧបទ្ទវហេតុឆេះបាឡុងលើអាកាស ដែលបណ្តាលឱ្យអ្នកជិះចំនួន ៨ នាក់បានបាត់បង់ជីវិត និង ១៣ នាក់ទៀតបានរងរបួស។
តាមព័ត៌មានបានឱ្យដឹងថា បាឡុងខាងលើនេះជាបាឡុងទទួលសេវាកម្មនាំភ្ញៀវឡើងទៅទស្សនាទេសភាពពីលើអាកាសកម្ពស់ ១០០០ ម៉ែត្រ ដោយមានតម្លៃ ១០០ ដុល្លាក្នុងម្នាក់ និង ជិះបានចំនួន ៤៥ នាទី។ តាមរយៈអ្នកបញ្ជាបាឡុងនេះដែលនៅមានជីវិត បានរៀបរាប់ឱ្យដឹងថា នៅថ្ងៃកើតហេតុមានភ្ញៀវចំនួន ២០ នាក់ រួមទាំងខ្លួនផងដែរ។ ខណៈកំពុងតែធ្វើដំណើរមកដល់រដ្ឋ Santa Catarina ភាគខាងត្បូងប្រទេសប្រេស៊ីល ស្រាប់តែមានការឆេះចេញពីកន្រ្តកដែលផ្ទុកអ្នកដំណើរនោះ ហើយខ្លួនក៏បានព្យាយាមបន្ទាបបាឡុងមកដី ដើម្បីឱ្យអ្នកដំណើរលោតចេញ តែមានអ្នកខ្លះក៏បានលោត តែអ្នកខ្លះមិនហ៊ានលោតឡើយ ហើយបាឡុងក៏បានផ្ទុះឆេះនៅលើអាកាសនោះតែម្តង។
យ៉ាងណាមិញ ខាងអាជ្ញាធរបានរកឃើញថាមានអ្នកស្លាប់ចំនួន ៨ នាក់ ដែលក្នុងនោះមាន ៣ នាក់បានស្លាប់ក្នុងសភាពឱបគ្នា ដែលធ្វើឱ្យមហាជនអាណិតរំជួលចិត្តជាខ្លាំង។ ចំណែកឯ ១៣ នាក់ទៀតបានរងរបួស ហើយក៏ត្រូវបានអាជ្ញាធរបញ្ជូនទៅមន្ទីរពេទ្យ ដើម្បីសង្រ្គោះជីវិតផងដែរ៕
ប្រភព៖ Kenh14
