អ្នកគាំទ្រវិស័យបវរកញ្ញាដែលតាមដានកម្មវិធី Miss Supranational Cambodia 2025 កន្លងមក ក្រៅពីចាប់អារម្មណ៍សរសើរពីរាជិនីម្ចាស់មកុដថ្មី MSC 2025 ឃើញថាចំពោះលំដាប់រងទី ១ MSC 2025 ស្រីស្អាតកូនខ្មែរកាត់អាមេរិក ស៊ីដនី ម៉ារិទ្ធ ក៏មានភាពលេចធ្លោឆក់បានការគាំទ្រមិនធម្មតាដែរ។
ពិតណាស់ ក្រោយក្លាយជាម្ចាស់ជ័យលាភីរងទី ១ MSC 2025 នេះ កញ្ញា ស៊ីដនី ម៉ារិទ្ធ កាន់តែឆក់បានប្រជាប្រិយភាពខ្លាំងពីមហាជនលើបណ្ដាញសង្គម ដែលស្រឡាញ់គាំទ្របវរកញ្ញារូបនេះ ព្រមទាំងនាងកំពុងក្ដោបបានទីផ្សារការងារផ្សេងៗលើវិស័យនេះជាបន្តបន្ទាប់ មិនចាញ់ម្ចាស់មកុដប៉ុន្មានឡើយ។
ជាក់ស្ដែង ថ្មីៗកន្លងទៅនេះ កញ្ញា ស៊ីដនី ម៉ារិទ្ធ លំដាប់រង ១ MSC 2025 រូបនេះ ក្ដោបបានឱកាសលើកដំបូងលើឆាកអន្តរជាតិ ដែលត្រូវបានកម្មវិធីប្រកួតអន្តរជាតិនៅប្រទេសឥណ្ឌូនេស៊ី អញ្ជើញនាងចូលរួមជាភ្ញៀវកិត្តិយសក្នុងកម្មវិធីប្រកួត Puteri Indonesia 2025។
ជាមួយនឹងវត្តមានរបស់កញ្ញា ស៊ីដនី ម៉ារិទ្ធ លើទឹកដីប្រទេសឥណ្ឌូនេស៊ីនេះដែរ ត្រូវបានមហាជនអ្នកគាំទ្រសរសើរពីការរៀបចំខ្លួនយ៉ាងលេចធ្លោក្នុងនាមជាបវរកញ្ញាកម្ពុជា មិនឱ្យចាញ់បេក្ខភាពប្រកួតលើឆាកអន្តរជាតិនេះឡើយ ជាពិសេសបវរកញ្ញារូបនេះក៏បានតុបតែងខ្លួនគ្រងឈុតកូនក្រមុំរបស់ឥណ្ឌូនេស៊ីយ៉ាងស្រស់ស្អាតទៀតផង៕
