មហាជនអ្នកគាំទ្រ Miss Universe Cambodia 2020 កញ្ញា រ៉េត សារីតា មួយចំនួនច្បាស់ជាធ្លាប់បានដឹងខ្លះមកហើយពីជីវិតឯកជនរបស់កញ្ញា ពោលគឺពីជីវិតគ្រួសាររបស់តារាស្រីរូបនេះ។ ក្នុងនោះ កញ្ញា រ៉េត សារីតា គឺជាកូនស្រីច្បង ក្នុងចំណោមបងប្អូន ៤ នាក់ ដោយមានស្រី ៣ នាក់ និង ប្រុស ១ នាក់។
ក្រឡេកទៅមើលប្អូនប្រុសទី ៣ របស់កញ្ញា រ៉េត សារីតា ដែលមានឈ្មោះថា រ៉េត វិសុថាន់ ឯណោះវិញ ក៏មានដុងសិល្បៈមិនចាញ់បងនោះឡើយ ដោយលោក រ៉េត វិសុថាន់ ក៏ជាតារាសម្តែងធ្លាប់បានបង្ហាញខ្លួនក្នុងខ្សែភាពយន្តជាច្រើនរួមមានរឿង «The Flag» និង រឿង «ឧក្រិដ្ឋជន» និង រឿង «ព្យុះកំបុតត្បូង» ជាដើម។
ក្នុងនោះ ភាគច្រើន រឿងដែលប្អូនប្រុសទី ៣ របស់កញ្ញា រ៉េត សារីតា បានសម្តែង គឺជាសាច់រឿងបែបវាយ ប្រយុទ្ធ ក៏ព្រោះតែលោក រ៉េត វិសុថាន់ គឺជាកីឡាករគុនល្បុក្កត្តោ និង ជាអ្នកសម្តែងក្បាច់គុនល្បុក្កត្តោដ៏មានថ្វីដៃទៀតផង។
យ៉ាងណាមិញ ថ្មីៗនេះ លោក រ៉េត វិសុថាន់ បានធ្វើឱ្យមហាជនផ្ទុះការចាប់អារម្មណ៍យ៉ាងខ្លាំង ក៏ព្រោះតែលោកបានបង្ហាញវត្តមានក្នុងការសម្តែងខ្សែភាពយន្តបរទេស ដែលផលិតឡើងដោយផលិតកម្មជប៉ុន។ ក្នុងនោះ អ្នកគាំទ្របានលើកឡើងថា លោក រ៉េត វិសុថាន់ ពិតជាមានសមត្ថភាព ដែលត្រូវបានផលិតកម្មបរទេសជ្រើសរើសឱ្យសម្តែងបែបនេះ៕
សូមចុចទីនេះ ដើម្បីទស្សនាវីដេអូ៖
