និយាយពីវិស័យចម្រៀងរបស់កំពូលតារាចម្រៀងរៀមច្បង អ្នកនាង សុគន្ធ និសា ស្របពេលមហាជនចាប់អារម្មណ៍ដឹងថាអ្នកនាងបានក្លាយជាតារាចម្រៀងឯករាជ្យមួយរូប ឃើញថាមួយរយៈចុងក្រោយនេះ ដ្បិតតែមិនឃើញអ្នកនាងចេញស្នាដៃចម្រៀងថ្មីៗ ប៉ុន្តែអ្នកនាងក៏កំពុងក្ដោបបានទីផ្សារខ្លាំងតាមរយៈការអញ្ជើញចូលរួមច្រៀងក្នុងកម្មវិធីតន្រ្តីតូចធំ កម្មវិធីមង្គល និង តាមបណ្ដាក្លឹប ឬ Pub ផ្សេងៗមិនដាច់ឡើយ។
រីឯតារាចម្រៀងស្រី ពេជ្រ សូលីកា មួយរយៈក្រោយ មហាជនក៏បានជ្រាបហើយថាការងារសិល្បៈរបស់អ្នកនាង កំពុងក្ដោបបានប្រជាប្រិយភាពកាន់តែខ្លាំង និង មានសន្ទុះទីផ្សារហក់ឡើងមិនធម្មតា ដែលតែងឃើញវត្តមានរបស់នាងចូលរួមកម្មវិធីប្រគំតន្រ្តីតូចធំហូរហែ ទាំង Pub, ក្លឹប និង កម្មវិធីមង្គលផ្សេងៗផងដែរ។
លើសពីនេះ ចំពោះស្នាដៃបទចម្រៀងរបស់អ្នកនាង ពេជ្រ សូលីកា ក៏កាន់តែឆក់បានការចាប់អារម្មណ៍គាំទ្រខ្លាំង ខណៈនាងបានបញ្ចេញស្នាដៃបទចម្រៀងថ្មីៗបន្តបន្ទាប់ សុទ្ធសឹងតែពេញនិយមផ្ទុះការគាំទ្រពេញចិត្ត ជាពិសេសបទចម្រៀងមនោសញ្ចេតនា ស្នេហា កម្សត់ឈឺចាប់ ចាក់ដោតអារម្មណ៍ គឺទទួលបានការពេញនិយមខ្លាំងពីយុវវ័យ។
ដោយឡែក ថ្មីៗនេះ អ្វីកាន់តែធ្វើឱ្យមហាជន ជាពិសេសអ្នកគាំទ្ររបស់អ្នកនាង ពេជ្រ សូលីកា និង កំពូលតារាចម្រៀងរៀមច្បង សុគន្ធ និសា ផ្ទុះចាប់អារម្មណ៍ចែករំលែកខ្លាំង ខណៈថ្មីៗនេះអ្នកទាំងពីរ ចាប់ដៃគ្នាចេញចម្រៀងរួមគ្នាជាលើកដំបូង ជាចម្រៀងបែបមនោសញ្ចេតនាស្នេហា គឺបទ «ពេលយើងឈ្លោះគ្នា» កំពុងផ្ទុះការគាំទ្រពេញចិត្តខ្លាំងពីមហាជនលើបណ្ដាញសង្គមគ្រប់ស្រទាប់ និង រង់ចាំមើលការបកស្រាយរួមគ្នាដោយផ្ទាល់ពីតារាចម្រៀងស្រីទាំងពីរ លើឆាកតន្រ្តីផ្សេងៗផងដែរ៕
សូមចុចទីនេះដើម្បីទស្សនាវីដេអូ៖
