ជាការពិតណាស់ យុវវ័យនិយមគាំទ្រសមាជិកក្រុមចម្រៀងរ៉េប La Cima Cartel ច្បាស់ជាបានដឹងមកហើយនូវប្រជាប្រិយភាពរបស់លោក YCN Rakhie ដែលទទួលបានការគាំទ្រមិនខុសពីសមាជិកដទៃទៀតនោះឡើយ។ ជាក់ស្តែង រាល់បទចម្រៀងមួយបទៗរបស់លោក ដែលផលិតចេញមកសុទ្ធសឹងតែមានការគាំទ្រ និង និយមស្តាប់យ៉ាងខ្លាំងថែមទៀតផង។
យ៉ាងណាមិញ បើនិយាយពីបទ «007» ដែលបានចេញតាំងពីប្រមាណ ២ ឆ្នាំ មុននោះ ក៏នៅតែទទួលបានគាំទ្រខ្លាំងពីសំណាក់យុវវ័យ ដោយគេដឹងថា បទនេះ ក៏មានសំឡេងរបស់អតីតតារាកំប្លែងជើងចាស់ លោក អ៊ូ ប៉ុណ្ណារ៉ាត់ ហៅ នាយក្រឹម ក្នុងនោះដែរ។ លើសពីនោះ MV នៃចម្រៀងខាងលើ ក៏មានវត្តមានរបស់ នាយក្រឹម ចូលរួមសម្តែងដូចគ្នា។
ដោយឡែក ក្រោយប៉ះគ្នាក្នុង MV ម្តងហើយនោះ ស្រាប់តែក្នុងការប្រគំតន្ត្រី La Cima Tour Concert នៅឯភ្នំពេញកាលពីថ្ងៃទី ៣១ ខែឧសភា ឆ្នាំ ២០២៥ កន្លងទៅ លោក YCN Rakhie បានធ្វើឱ្យអ្នកគាំទ្រភ្ញាក់ផ្អើលយ៉ាងខ្លាំង ដោយលោកបានអញ្ជើញ នាយក្រឹម មកចូលរួមសម្តែងនៅលើឆាករួមគ្នាជាលើកទី ១។
ក្នុងនោះ សូម្បីតែ YCN Rakhie ខ្លួនឯងក៏រំភើបចិត្តដូចគ្នា រហូតបង្ហោះសារមួយថា៖ «សូមថ្លែងអំណរគុណដល់ លោកពូក្រឹម ដែលបានចំណាយពេលដ៏មានតម្លៃ មកចូលរួមសម្តែងក្នុងបទ 007 ជូនបងប្អូនទស្សនាជាលើកដំបូងនៅលើឆាកដ៏ធំមួយនេះ»៕
សូមចុចទីនេះ ដើម្បីទស្សនាវីដេអូ៖
