ថ្មីៗនេះ អ្នកនិយមតាមដានវិស័យសិល្បៈបុរាណ ច្បាស់ជាបានជ្រាបមកហើយពីស្ថានភាពជំងឺរបស់លោក ឈឺន ឃីម ហៅ ណាឃីម ដែលកំពុងធ្លាក់ខ្លួនឈឺខ្លាំងដោយក្រុមគ្រួសារបានឱ្យដឹងបឋមថា លោក ណាឃីម មានជំងឺរលាកស្រោមខួរ, រលាកសួតធ្ងន់ធ្ងរ និង ក្រពះពោះវៀន។ បច្ចុប្បន្ន លោក ណាឃីម មានអាការវង្វេង ភ្នែកមើលលែងឃើញ ត្រចៀកស្តាប់លែងឮ នោមមិនចេញ និង បាយមិនបានផងដែរ។
យ៉ាងណាមិញ ដោយអាការកាន់តែធ្ងន់ធ្ងរ កាលពីរសៀលថ្ងៃទី ១៤ ខែតុលា ឆ្នាំ ២០២៥ កន្លងទៅនេះ តាមរយៈការបង្ហោះវីដេអូ និង ឱ្យដឹងពីមិត្តភក្តិក្នុងវិស័យសិល្បៈបុរាណ គឺលោក ព្រហ្ម ប្រសិទ្ធី បានឱ្យដឹងថា លោក ណាឃីម បានបញ្ជូនទៅដល់មន្ទីរពេទ្យនៅប្រទេសវៀតណាមហើយ ដោយមានរូបលោករួមដំណើរទៅជាមួយ។
ក្រោយទៅដល់មន្ទីរពេទ្យនៅប្រទេសវៀតណាម លោក ព្រហ្ម ប្រសិទ្ធី ក៏បានជម្រាបពីអាការលោក ណាឃីម ជាបន្តបន្ទាប់ ដោយព័ត៌មានដំបូងទទួលបានពីគ្រូពេទ្យថា៖ «ប្អូនប្រុស ណាឃីម សង្ស័យមានជំងឺរលាកខួរក្បាលធ្ងន់ធ្ងរ និង រលាកសួត ប៉ុន្តែនៅមិនទាន់ច្បាស់លាស់នៅឡើយទេ ព្រោះត្រូវរង់ចាំមើលលទ្ធផល ពីគ្រូពេទ្យជំនាញនៅថ្ងៃស្អែក។ អរគុណបងប្អូនដែលបារម្ភ! ពេលនេះ ណាឃីម កំពុងសម្រាកព្យាបាលនៅ មន្ទីពេទ្យ ទាហ៊ាន 175 ហូជីមិញ ប្រទេសវៀតណាម»។
ក្នុងនោះ លោក ព្រហ្ម ប្រសិទ្ធី បានបន្ថែមថា៖ «អាការ ណាឃីម ព្រឹកនេះ រាងអន់រវើរវាយបន្តិចហើយ! គ្រូពេទ្យប្រាប់ថា យ៉ាងយូរ ៣ ថ្ងៃទៀត អាចស្ដាប់ឮ មើលឃើញ ស្ងប់អារម្មណ៍ជាងហ្នឹងបន្តិចហើយ»៕
សូមចុចទីនេះ ដើម្បីទស្សនាវីដេអូ៖
