មហាជនអ្នកគាំទ្ររបស់តារាកំប្លែងជើងចាស់ល្បីឈ្មោះ យាយ យ៉យ និង កូនប្រុស គឺនាយ ព្រែក សុទ្ធសឹងតែបានដឹងហើយពីសមត្ថភាព ទេពកោល្យរបស់ម្ដាយកូនអ្នកទាំងពីរលើវិស័យសិល្បៈកន្លងមក ដែលសុទ្ធសឹងតែអាចចាត់ទុកជាសិល្បករពហុជំនាញ បានទាំងសម្ដែង ទាំងកំប្លែង ច្រៀងចម្រៀងអាយៃ បុរាណ សម័យ គ្រប់ទម្រង់។
លើសពីនេះ យាយ យ៉យ និង កូនប្រុសដែលដើរតាមគន្លងម្ដាយជាតារាកំប្លែងតាំងពីតូចនេះ ដ្បិតតែបានប្រឡូកសិល្បៈមានឈ្មោះល្បីជាច្រើនឆ្នាំមកមែន ប៉ុន្តែមកដល់ពេលនេះនៅតែរក្សាបានប្រជាប្រិយភាពខ្លាំងដដែលតាមរយៈការបង្ហាញស្នាដៃថ្មីៗ។ ជាក់ស្ដែង សព្វថ្ងៃ នាយ ព្រែក និង អ្នកម្ដាយ បានចាប់ដៃគ្នាសម្ដែងសាច់រឿងខ្លីៗបង្ហោះលើបណ្ដាញសង្គមកំពុងផ្ទុះការចាប់អារម្មណ៍ខ្លាំងផងដែរ។
ដោយឡែក ថ្មីៗនេះ អ្វីកាន់តែចាប់អារម្មណ៍ គឺទាក់ទងនឹងរឿងរ៉ាវជីវិតក្រៅសិល្បៈរបស់តារាកំប្លែងជើងចាស់ យាយ យ៉យ និង កូនប្រុស ដែលមិនធ្លាប់ដឹងពីមុនមក ខណៈបានស្ដាប់ នាយ ព្រែក និយាយរៀបរាប់ក្នុងកិច្ចសម្ភាស «សខ្មៅ» ជុំវិញការងារសិល្បៈរបស់ខ្លួន និង ម្ដាយ ជាច្រើន។
ក្នុងនោះ នាយ ព្រែក ក៏បានទម្លាយរឿងរ៉ាវមុនពេលចូលសិល្បៈតាមអ្នកម្ដាយ បានឱ្យដឹងថាកាលនោះ ដ្បិតតែ យាយ យ៉យ ជោគជ័យមានឈ្មោះល្បីមែន ប៉ុន្តែមិនដែលចង់ជំរុញឱ្យកូនប្រុសប្រឡូកសិល្បៈតាមគន្លងឡើយ ព្រោះតែសិល្បៈកាលសម័យនោះ ពុំសូវរកចំណូលបានច្រើនអាចផ្គត់ផ្គង់ជីវភាពរស់ស្រួលឡើយ ប៉ុន្តែដោយសារតែ នាយ ព្រែក មានដុងសិល្បៈតាំងពីកំណើត និង ស្រឡាញ់ចង់ចូលដោយខ្លួនឯង ទើបអាចប្រឡូកតាមអ្នកម្ដាយបង្ហាញសមត្ថភាព ទេពកោសល្យរបស់ខ្លួនជាបន្តបន្ទាប់រហូតជោគជ័យមានឈ្មោះល្បីមកដល់សព្វថ្ងៃ៕
សូមចុចទីនេះដើម្បីទស្សនាវីដេអូ៖
