អ្នកគាំទ្រកំពូលតារាចម្រៀងរ៉េប វណ្ណដា ច្បាស់ជាបានជ្រាបហើយថា កាលពីថ្ងែទី ០៦ ខែឧសភា ឆ្នាំ ២០២៥ កន្លងទៅ លោកបាន នាំតារាចម្រៀងរ៉េបជប៉ុន Awich ដើរមើលផ្សារលើ ក្រុងព្រះសហនុ និង បានទៅលេងដល់តូបកោសដូងរបស់ឪពុកម្តាយលោកផងដែរ។
ក្នុងនោះដែរ លោក វណ្ណដា ក៏បានបង្ហាញសកម្មភាពខ្លះៗក្នុងផ្សារ និង កោសដូងឱ្យតារាចម្រៀងរ៉េប Awich មើល និង ថតផ្តិតយករូបភាព វីដេអូថែមទៀតផង។
ដោយឡែក អ្វីដែលគួរឱ្យចាប់អារម្មណ៍ទៀតនោះ ក្នុងវីដេអូបង្ហាញសកម្មភាពនៅកន្លែងតូបកោសដូងរបស់ឪពុកម្តាយលោក វណ្ណដា គេបានឃើញអតីតតារាចម្រៀង លោក វណ្ណឌី ដែលជាបងប្រុសបង្កើត ក៏បាននៅទីនោះជាមួយគ្នាដែរ។
ជាក់ស្តែង អ្វីដែលធ្វើឱ្យអ្នកគាំទ្រឃើញវីដេអូនោះហើយ រំភើបចិត្តនោះ ខណៈក្រសែភ្នែករបស់ លោក វណ្ណឌី បានសម្លឹងមកកាន់ លោក វណ្ណដា ជាប្អូនប្រុសដោយស្នាមញញឹម ហាក់បង្គប់នូវអារម្មណ៍អ្វីម្យ៉ាង ពោលគឺអ្នកគាំទ្រលើកឡើងថា លោក វណ្ណឌី បានបង្ហាញក្រសែភ្នែកយ៉ាងមោទកភាពចំពោះប្អូនប្រុស។
ជាការពិតណាស់ អ្នកគាំទ្រតារាចម្រៀងរ៉េប វណ្ណដា ច្បាស់ជាបានជ្រាបហើយថា កាលកន្លងមក លោក វណ្ណដា តែងតែលើកឡើងថា បងប្រុសរបស់លោក គឺលោក វណ្ណឌី គឺជាអ្នកអូសទាញលោកពីការដើរផ្លូវខុស ហើយលោក វណ្ណឌី នេះហើយ ជាអ្នកឱ្យលោកស្គាល់តន្ត្រី Hip-Hop និង បានឈរពីក្រោយខ្នង ជាផ្នែកមួយនាំលោកមករកភាពជោគជ័យដូចសព្វថ្ងៃ៕
សូមចុចទីនេះ ដើម្បីទស្សនាវីដេអូ៖
