បើគិតមកដល់ពេលនេះ រយៈពេលប្រមាណ ២០ ឆ្នាំ មកហើយ លើវិថីសិល្បៈរបស់លោក ណាំ ប៊ុណ្ណារ័ត្ន ដែលជាតារាចម្រៀងផ្នែកបុរស និង ត្រូវបានគេដាក់ងារថា ជាតារាចម្រៀងនិយមបកស្រាយចម្រៀងមបែបនោសញ្ចេតនា។
ក្រៅពីជាតារាចម្រៀង លោក ណាំ ប៊ុណ្ណារ័ត្ន ក៏ជាតន្ត្រីករមួយរូប ដែលបានបញ្ចប់ការសិក្សាផ្នែកតន្ត្រីពីសាកលវិទ្យាភូមិន្ទ និង វិចិត្រសិល្បៈ ព្រមទាំងពីក្រៅប្រទេសថែមទៀតផង។ ក្នុងនោះ លោក ណាំ ប៊ុណ្ណារ័ត្ន ក៏ជាអ្នកនិពន្ធទំនុកភ្លេងមានស្នាដៃជាច្រើនផងដែរ។
ងាកមកកាន់វិថីសិល្បៈឯណោះវិញ បើទោះជាឆ្នាំនេះ លោក ណាំ ប៊ុណ្ណារ័ត្ន មានវ័យកាន់តែជ្រេ និង មានភរិយា មានកូនដល់ទៅ ២ នាក់ហើយក្តី តែតារាចម្រៀងសំឡេងផ្អែមរូបនេះ នៅតែថែរក្សាសម្រស់ស្រស់សង្ហាដូចដើម។ ម្យ៉ាងវិញទៀត បើនិយាយពីការងារសិល្បៈវិញ រៀមច្បងរូបនេះ ក៏នៅតែក្តោបការងារកាន់តែច្រើនទៅៗ ដោយគេឃើញថា លោក ណាំ ប៊ុណ្ណារ័ត្ន បង្ហាញពីកាលវិភាគការងារគ្មានលស់ថ្ងៃ និង ស្ទើរតែគ្រប់ខេត្ត ក្រុងទៅហើយ៕
