រាជិនីសំឡេង ម៉េង កែវពេជ្ជតា ទទួលយកមិនបាន ក្រោយ សុខ ស្រីមុំ បែកឆ្វេងព្រហើនហ៊ានប្រមាថអង្គព្រះមហាក្សត្រ និង ហ្លួងម៉ែ

អ្នកលេងបណ្តាញសង្គមហ្វេសប៊ុក និង Tik Tok ច្បាស់ជាបានឃើញហើយ នូវវីដេអូមួយរបស់អតីតតារាភាពយន្តជើងចាស់ អ្នកនាង សុខ ស្រីមុំ ត្រូវបានចែករំលែក ដោយអតីតតារាភាពយន្តរូបនេះ បានប្រើពាក្យធ្ងន់ៗប្រមាថដល់អង្គព្រះមហាក្សត្រខ្មែរ និង សម្ដេចព្រះមហាក្សត្រីយានី ជាទីសក្ការៈដ៏ខ្ពង់ខ្ពស់នៃប្រជានុរាស្ត្រខ្មែរ។

ក្នុងវីដេអូនោះ អ្នកនាង សុខ ស្រីមុំ បានប្រើពាក្យមិនគប្បីក្នុងន័យប្រមាថយ៉ាងធ្ងន់ធ្ងរដល់ អង្គព្រះមហាក្សត្រ និង ហ្លួងម៉ែ ថាមិនបានយាងទៅសួរសុខទុក្ខប្រជានុរាស្ត្រនៅជំរំភៀសសឹក និង កងកម្លាំងទាហានកំពុងឈរជើងការពារបន្ទាត់ព្រំដែន ដែលជាហេតុធ្វើប្រជានុរាស្ត្រខ្មែរមិនអាចទទួលយកបាន ដោយមានអ្នកចូលបញ្ចេញមតិប្រតិកម្មជាបន្តបន្ទាប់។

ក្នុងនោះដែរ អ្នកនាង ម៉េង កែវពេជ្ជតា ជាអ្នកសិល្បៈមួយរូបដ៏ល្បីស្ថិតក្នុងជំនាន់ក្រោយអតីតតារាភាពយន្ត សុខ ស្រីមុំ បន្តិច ក៏បានចេញមកបង្ហោះសារហួសចិត្ត មិននឹកស្មានថាអ្នកនាង សុខ ស្រីមុំ ប្រែប្រួលយ៉ាងខ្លាំង រហូតដល់ថ្នាក់ហ៊ានប្រើពាក្យព្រហើនបែបនេះ។

អ្នកនាង ម៉េង កែវពេជ្ជតា បានរៀបរាប់ថា ៖ «ហេតុអីក៏ បងមុំ ប្រែប្រួលដល់ម្លឹង? ធ្លាប់តែឃេីញបងថតវីដេអូ និយាយឡិកឡក់ ហេីយឃេីញមហាជនជាច្រេីនគេចូលទៅដៀលបងថាដូចមនុស្សមិនគ្រប់ ក៏ប្អូនមិនដែលចូលទៅទេីសបងដូចគេដែរ មានតែអាណិត ព្រោះគិតថានោះសិទ្ធិជាសេរីភាពបង ប៉ុន្តែរឿងថ្មីមួយនេះ បងមុំ លេីសហេីយ លេីសខ្លាំង ដែលប្អូនមិនអាចស្ងៀមបាន។ បងដឹងមកពីណាថា ព្រះអង្គ មិនរវល់កូនចៅលោក? បេីបងមិនដឹងអីទេ ឈប់ទៅបង បាបណាស់ ។ នេះស្តេចខ្មែរទេបង ដែលលោកស្លូតបូត តែបេីស្តេចសៀមវិញ បេីបងប្រមាថជាសាធារណៈដល់ម្លឹងហេីយ គឺគុកអត់ថ្ងៃចេញទេបងមុំ។ បងត្រូវចាំ កូនណាដែលជេរ ឪពុកម្តាយខ្លួនឯង កូននោះគ្មានកំណេីត និង គ្មាននរណាហ៊ានយកខ្លួនបៀតទេ»៕