រសៀលនេះ! អង្គទូត ១១ ប្រទេស និង ទីភ្នាក់ងារអង្គការសហប្រជាជាតិ ១៥ ស្ថាប័ន ចុះត្រួតពិនិត្យទីតាំងជនភៀសសឹក នៅបន្ទាយអំពិល

តាមការចេញផ្សាយរបស់ទូរទស្សន៍ជាតិកម្ពុជា បានឱ្យដឹងថា នៅរសៀលថ្ងៃទី ៦ ខែសីហា ឆ្នាំ២០២៥ នេះ បណ្ដាអង្គទូត និង ទីភ្នាក់ងាររបស់អង្គការសហប្រជាជាតិ (UN) រួមមាន អង្គការសុខភាពពិភពលោក (WHO) ព្រមទាំងអង្គការពាក់ព័ន្ធផ្សេងទៀត បានចុះត្រួតពិនិត្យទីតាំងផ្ទាល់នៅជំរំជនភៀសសឹក «បន្ទាយអំពិល» ស្ថិតក្នុងវត្តថ្មកំបោរ ភូមិពោធិ៍ចាស់ ស្រុកបន្ទាយអំពិល ខេត្តឧត្តរមានជ័យ។

បណ្ដាអង្គទូតដែលបានអញ្ជើញចុះត្រួតពិនិត្យទីតាំងផ្ទាល់នៅជំរំជនភៀសសឹកនេះមានចំនួន ១១ប្រទេស និងទីភ្នាក់ងាររបស់អង្គការសហប្រជាជាតិសរុបប្រមាណ ១៥ ស្ថាប័ន បានកត់ត្រាពីស្ថានភាពជាក់ស្ដែងរបស់ជនភៀសសឹក ក្រោយប្រទេសថៃបានធ្វើការឈ្លានពានមកលើប្រទេសកម្ពុជាតាមបណ្ដាព្រំដែន។

គួរជម្រាបថា អ្នកនាំពាក្យក្រសួងការពារជាតិ បានធ្វើបច្ចុប្បន្នភាពអំពីស្ថានភាពនៃចំនួនជនភៀសសឹក គិតត្រឹមថ្ងៃទី៤ ខែសីហា ឆ្នាំ២០២៥ (វេលាម៉ោង ១៨:៣០នាទី) សរុបរួមចំនួនជនភៀសសឹកចំនួន ១២៤ ៩៤០ នាក់ ដែលមកពីបណ្ដាខេត្តដូចខាងក្រោម ៖
១. ខេត្តឧត្តរមានជ័យ ចំនួន ៣៤ ០២៧ នាក់
២. ខេត្តព្រះវិហារ ចំនួន ៤២ ០១៦ នាក់
៣. ខេត្តបន្ទាយមានជ័យ ចំនួន ៨ ៥០៥ នាក់
៤. ខេត្តពោធិ៍សាត់ ចំនួន ៩០៦ នាក់
៥. ខេត្តសៀមរាប ចំនួន ៣៩ ៤៨៦ នាក់ ៕