ទាក់ទងនឹងជីវិតឯកជនរបស់តារាសម្ដែងស្រីរូបស្រស់អ្នកនាង សិទ្ធី នីកា រយៈពេលច្រើនឆ្នាំមកហើយ ដែលនាងបានបង្ហាញពីជីវិតសាងគ្រួសារជាមួយស្វាមីបណ្ដូលចិត្តជាប់សែរាជ្យរង្ស និង ទទួលបានកូនប្រុសដ៏គួរឱ្យក្នាញ់ម្នាក់អាយុ ៥ ឆ្នាំហើយ។
ម្យ៉ាងវិញទៀត តារាស្រី សិទ្ធី នីកា ក៏តែងស្ដែងពីជីវិតគ្រួសារពេញដោយភាពកក់ក្ដៅ និង បង្ហាញពីក្ដីសុខផ្ទាល់ខ្លួនជានារីមានសំណាងម្នាក់ ទទួលជីវិតគ្រួសារពេញលេញ មានស្វាមីស្រឡាញ់តាមមើលថែ ថ្នាក់ថ្នម ពូកែយល់ចិត្ត ព្រមទាំងមានកូនប្រុសឆ្លាតពូកែផងដែរ។
ចំពោះវិស័យសិល្បៈរបស់តារាស្រីរូបនេះ បច្ចុប្បន្ន ដ្បិតតែនាងកំពុងមានជីវិតមួយពេញដោយក្ដីសុខមានគ្រួសារកក់ក្ដៅ និង រស់បែបអភិជនក្នុងត្រកូលខ្ពង់ខ្ពស់មែន ប៉ុន្តែកន្លងមក សិទ្ធី នីកា ក៏មិនធ្លាប់បង្ហាញបំណងចង់បញ្ចប់អាជីពសិល្បៈនេះឡើយ ដោយឃើញនាងនៅតែបន្តការងារសិល្បៈដូចដើម ខណៈមានការលើកទឹកចិត្តគាំទ្រពេញទំហឹងពីស្វាមីរបស់នាងផងដែរ។
ស្របពេលមមាញឹកនឹងការងារខ្លាំងមែន តែតារាស្រី សិទ្ធី នីកា ក៏មិនភ្លេចឆ្លៀតចំណាយជាមួយគ្រួសារ ស្វាមី និង មើលថែកូនប្រុសបណ្ដូលចិត្តដោយផ្ទាល់ដៃដែរ។ ជាក់ស្ដែង ថ្មីៗនេះ អ្វីដែលធ្វើឱ្យអ្នកគាំទ្រចាប់អារម្មណ៍ជីវិតគ្រួសាររបស់តារាស្រីរូបនេះ ខណៈបានឃើញអ្នកនាង សិទ្ធី នីកា និង ស្វាមី បណ្ដើរគ្នាទៅក្រៅប្រទេស ចំណាយពេលផ្ទាល់ខ្លួនទៅសាងភាពផ្អែមល្ហែមតែពីរនាក់ប្ដីប្រពន្ធដូចគូស្នេហ៍ថ្មីថ្មោងអ៊ីចឹង៕
